英國NETFLIX最受歡迎電影 居然係呢套青春片?

睇戲渠道有好多種,唔一定要去戲院嘅。而家唔少人都喺網上平台睇電影,反映一套戲有幾受歡迎,唔止睇票房成績,甚至唔能夠單睇票房成績 - 網上獨家,都冇上畫,票咩房先?

早幾日英國Netflix就公布咗4月嘅十大最受歡迎電影同埋節目,或多或少可以反映時下觀眾口味。

個個都話睇《復仇者聯盟4︰終局之戰》前要「溫書」,睇返《復3》以及其他MCU電影追返人物關係。不過十大電影嘅冠軍,居然係一套叫The Perfect Date嘅青春校園愛情片。主角Brooks考上名牌大學,但係冇錢交學費,竟然諗到條財路,就係做part time boyfriend……唔好諗邪嘢!係用嚟俾班豬妹女生帶出去見朋友威吓嗰隻啫。佢仲搵埋個friend做隻app出來,生意越玩越大,偏偏呢個時候就遇到真愛!

好典型嘅美式chick flick,N記之前推過部To All the Boys I Loved Before反應都唔錯。4月大地回春又係復活節假期,呢類輕輕鬆鬆甜蜜蜜之選自然多人睇。

第二位嘅The Highwaymen就唔同嘞,卡士有金像影后Kathy Bates、老戲骨Woody Harrelson同 Kevin Costner,導演John Lee Hancock前作有推到Sandra Bullock做影后嘅《守護有心人》(The Blind Side),同埋「麥記」快餐王國傳奇嘅《大創業家》(The Founder)。上世紀30年代,雌雄大導Bonnie and Clyde犯案纍纍殺人無數, 就連FBI都拉佢地唔到。2位來自德洲嘅警探,就用自己嘅方法查案,將匪徒繩之於法。呢類「硬派」嘅戲如果喺戲院上,好可能係獎項大熱但票房麻麻。

仲以為做N記會員最多都係睇返舊戲?頭5位有4套都係自家製作,難怪唔少電影人對網路電影市場虎視眈眈。

值得一題嘅係,4月N記收視榜上,整體最多人睇嘅節目,係英國老牌自然紀錄片主持兼製作人「阿Sir」David Attenborough嘅新作Our Planet。社交網站上唔少人都share嗰條海象為獵食爬上山崖但慘遭跌死嘅片,絕對有助推高收睇意欲。亦有文章認為,Our Planet嘅成功,係對同「阿sir」合作多年嘅BBC一記當頭棒喝。

新平台令唔少製作人搵到新出路,能夠同傳統嘅電影、電視媒體平分春色,相信都係指日可待嘅事。