《花木蘭》真人版出街 網民睇完大叫「還我童年回憶」

迪士尼《花木蘭》真人版電影出咗初版預告,雖然得短短分半鐘都夠引起熱烈回應。有唔少討論集中於《花》演員選角上,作為迪士尼首部全亞裔演員主演嘅電影,回應美國荷里活應該種族多元,獲得唔少讚賞;亦有唔少網友認為既然《小魚仙》可以由黑人女星Halle Bailey主演,點解花木蘭一定要係亞裔演員飾演?

花木蘭係中國有名歷史人物,代父從軍嘅孝女,好多人識背《木蘭辭》,不過對於外國網民嚟講,佢地認識嘅木蘭係1998年迪士尼動畫。其中人物包括木蘭、蟋蟀同木須龍,仲有首好hit由Christina Aguilera唱嘅歌《Reflection》,木蘭喺佢地心目中同其他迪士尼公主無咩分別。

不過今次真人版《花》似乎無跟動畫版拍,較貼近史實中嘅花木蘭,預告片見到電影動作場面幾多,花木蘭好打得下,有一下以為睇緊《卧虎藏龍》。迪士尼將花木蘭塑造成為新一代女英雌,主線會講擁有優秀軍人特質:冷靜、 沉著、優雅、 自律等嘅木蘭上陣殺敵,所以無咗動畫版同李翔談情,同無咗條龍!

呢個設定令唔少美國網民大叫「還我美好童年回憶」!預告片仲未見有份主演嘅李連杰、甄子丹同鞏琍,唯有再等下其他宣傳片,不過對於香港觀眾嚟講,最崩潰應該係認唔到「仙女姐姐」劉亦菲,佢以古裝扮相成名,出名靚女,點解去到荷里活變哂樣?你睇下面張相……

預告片嘅木蘭話「佢有責任戰鬥」(it’s my duty to fight),2020年就知道佢有幾硬淨!話時話,花爸爸有幾分似習總,係電影公司用心安排嘅?