與馮盈盈姊妹反目?江嘉敏鬧爆:知人口面不知心

唔通真係愛情第一,友誼第二?

藝人馮盈盈與醫生男友Martin分手後,身邊不乏異性,火速與大隻仔主播鄭衍峰傳緋聞之外,最近更傳出與賭王四房公子何猷亨撻着,感情生活可謂多姿多釆。不過緋聞一出馮盈盈被指釣金龜,即搵好姊妹江嘉敏做擋箭牌,話係對方介紹,不過江嘉敏就唔認,反而周圍呻畀人拖落水,強調自己冇做媒人,傳出姊妹情起暗湧。爆出馮盈盈與何猷亨一早認識後,江嘉敏反指係馮盈盈請佢去船P,發生億元船P羅生門事件!

江嘉敏嬲爆發文。

江嘉敏前晚突然喺社交網「有感而發」,形容現實生活似「狼人殺」:「生活根本就係一場狼人殺。你根本唔知邊個講緊真話邊個講緊大話,亦都唔知邊個係狼人邊個先係村民。#聽到啲唔應該聽到嘅嘢#有感而發#其實世界好細#說話唔能夠亂講尤其係大話#人言可畏#真係知人口面不知心」有網友揣測係咪講緊馮盈盈。

似乎有弦外之音!
有網友揣測講緊馮盈盈。

江嘉敏透過電話回覆東網:「我哋有聯絡呀,仲約食tea、食飯,因為佢就生日嘛!不過我哋最近都開工,仲未夾到可以食飯呀。(發文鬧邊個?)呢個我唔應喇,係啲私事,只係真係太嬲,抒發吓情緒。」而盈盈就話:「我都唔清楚發生咩事,問佢本人比較好,謝謝!(佢有冇約你慶生?)都有,但大家都要開工,各有各忙,好多人約我都未有時間安排到。」東網再聯絡上江嘉敏,佢話:「我都唔知點解佢咁答,要問番佢,哈哈!」