與習近平握手惹網民不滿 楊千嬅:我要開心和尊重演出

楊千嬅

反修例運動持續超過半年,唔少藝人都有喺社交網站表態,甚至出席集會表明自己嘅立場,當中包括歌手楊千嬅。喺6月嘅時候,楊千嬅喺IG貼上寫有「R.I.P」圖片,疑似係悼念一名反修例嘅示威者,不過之後佢將圖片刪除,仲話自己嘅帳號被盜用。喺8月中,佢透過經理人公司喺微博發聲明表明愛祖國嘅心及「堅持香港特別行政區是中華人民共和國不可分割的一部分」。有唔少香港粉絲表示對佢失望及感到憤怒,更有人將多年珍藏嘅唱片打爛。另外,楊千嬅日前成為參與《澳門回歸20年文藝晚會》嘅唯一香港藝人,仲有機會同國家主席習近平喺台上握手,不過事後就惹來網民熱議。

丁子峻微博

而千嬅老公丁子高嘅堂哥丁子峻都有喺微博分享並留言話:「感動•光榮•感恩」,有唔少內地網民表示羨慕,不過同時亦有唔少網民鬧佢係牆頭草,紛紛留言話:「是否有感受到習爺爺的溫暖?」、「人仔vs骨氣,試過人仔幾好味邊會再有骨氣」、「齊上齊落,恭喜晒,沒有骨氣只會變奸妃,Sorry,已經搵唔到任何藉口再支持你,再見!」及「活該她在香港那邊被罵,兩面三刀的小人,牆頭草。」等等。

喺噚日,千嬅出席電影《麥路人》嘅座談會,期間被傳媒問到與國家主席握手嘅事,佢就話:「作為表演者,我要開心和尊重演出,對我嚟講,有工作就開心。」

另外,被問到點樣面對人生逆境嘅時候,千嬅就話人生唔一定順水,逆境係要時間改變。做人唔係淨係為個人生活,仲要成就背後嘅團隊,放低自己嘅個人想法。佢仲話,作為表演者,能夠參與該套電影發放正能量,令大家嘅心理質素好啲,已經係一個好開始。