自毀形象!奇洛李維斯拍完John Wick 變身做油頭粉面男

奇洛李維斯新戲《殺神3》叫好叫座,緊張嘅打鬥情節、俊朗嘅外表加上思念老婆嘅深情,男女通殺。所以呢頭剛剛上畫,嗰頭就宣佈開拍第4集,預計2021年上映!奇洛李維斯係唔少人嘅男神,近年作品唔少,不過拍幾多班fans都覺得唔夠,我就誠意推介大家留意5月31日喺Netflix登場嘅新片Always Be My Maybe!

Always Be My Maybe係愛情喜劇,由美國當紅楝篤笑匠Ali Wong同劇集Fresh Off The Boat演員Randall Park主演。故事講述2位本身係青梅祝馬,由細玩到大,讀大學時仲談過情做過拖友,不過畢業後你有你生活我有我忙碌,漸行漸遠。

Ali 離家往外闖成為星級名廚,Randall留守家鄉一面幫老豆手,一邊繼續玩音樂,足足15年無見過面嘅2人因為Ali工作關係再次重逢,往日情愫嘅美好回憶再次湧現,正當Randall小鹿亂撞打算告白時,Ali 興高采烈宣佈覓得真命天子!

睇故事似足陳套愛情喜劇,不過介紹得俾大家又點會係老套嘢呢?女主角Ali Wong本身係編劇出身,寫過唔少處境喜劇,例如講台灣家庭移民美國生活點滴嘅Fresh Off The Boat。

Always Be My Maybe延續Ali多咸又直接嘅風格,就算談情錯摸都露骨過人,最正係「奇哥」又肯拍,一改正經形象,飾演Ali戲內嘅真命天子,一見面就伸脷舌戰,角色油頭粉面,異常浮誇!

唔算係靠靚靚外表上位嘅Ali,寫劇本固然有一手,但真正谷起人氣就全靠佢創作嘅棟篤笑,分別係為溝仔無所不用其極嘅Baby Cobra,同講新手媽媽血淚史嘅Hard Knock Wife,2場棟篤笑笑點不斷,仲極多咸gag,尺度超大得嚟又講中哂女人心事,笑到抖唔到氣咁滯!尤其後者,新手媽一定要睇!

可能因為有奇哥客串,其他亞裔演員包括Ali Wong、Randall Park同Daniel Dae Kim(做電視劇Lost𠴱個)又有一定知名度,所以套戲會提前2日喺美國其中11個城市,包括紐約、洛杉磯、芝加哥同三藩市等嘅戲院上映,5月31日先正式登陸Netflix平台。想睇奇洛李維斯搞笑,千祈唔好錯過!