自揭八年SheShe情 30歲簡淑兒為BB整餅慶生

被封「仙氣女神」嘅簡淑兒雖擁有童顏但原來已屆30歲,輕熟女唔憂嫁,近年佢堅稱單身,社交網唔係po仙氣自拍照,就係同閨密嘅合照,日前佢仲親手整生日蛋糕,為佢最愛嘅「BB」慶祝牛一,八年姊妹情甜到漏,SheShe情甚濃!

撰文:東方新地

陳婉衡30歲生日,簡淑兒為佢慶生,仲一早佈置好場地送驚喜。

簡淑兒愛心蛋糕為「BB 」賀壽

究竟邊個可以令簡淑兒愛得死心塌地為佢整餅呢?咪就係佢個BB陳婉衡囉!二人相識於12年參選港姐,不過簡淑兒因個樣未進化而好早被foul,陳婉衡就憑36E導彈身材打入二十強,不過都係三甲不入。佢哋本來唔多熟,後來齊齊簽無綫做小花,一段奇妙友誼就咁開始。

簡淑兒親手整咗個芝士蛋糕,送畀佢嘅AlyciaBB(即係陳婉衡)。
壽星女開心到笑唔停,甜到入心。
簡淑兒為BB送上驚喜嘅同時,亦出po大讚陳婉衡keep得好唔似30歲。
兩姊妹感情好到年年都一齊去旅行,簡淑兒仲話以後每個生日都要陪陳婉衡過,仲約定如果大家都唔結婚就夾份買姑婆屋。

簡淑兒、陳婉衡共同進化

簡淑兒同陳婉衡雖然樣貌、身材同氣質都好唔同,不過佢哋都有共通點,就係齊齊由冇人識嘅小花捱到今時今日總算有啲知名度,仲一齊女大十八變,同當年選港姐真係判若兩人,簡淑兒五官變化唔使多講,有名你叫「仙氣女神」,陳婉衡就以身材掛帥,被封「無綫咪神」sell葫蘆身形同蜜桃臀。

八年前選港姐時嘅簡淑兒,又真係好難令人留下深刻印象嘅!
當年參選港姐嘅陳婉衡,身材已經好凸出。

最佳伴旅

睇住大家長大經歷真係唔少,簡淑兒同陳婉衡真係情如姊妹無所不談,笑一齊喊亦一齊,原來每年佢哋都會私底下約埋去旅行,去得最多就係泰國同日本,成日都影埋好多女神相放IG,睇得出佢哋感情堅係好。

當年一齊簽無綫出道,放工一齊搭巴士,二人有影皆雙。
簡淑兒自爆同陳婉衡去過好多個地方旅行,而且每次都好開心。
前年去泰國一齊歎住香檳浸泡泡浴,佢哋仲張呢張相放IG派福利。
當女神遇上咪神,原來可以發展一段好SWEET嘅姊妹情。
真係唔係講假,簡淑兒真係年年都同佢個BB慶祝生日,呢次係三年前。
陳婉衡自己亦趁30歲生日「大解放」在IG貼全祼浸浴照。

 

延伸閱讀:

2021年香港公眾假期攻略+假期日曆;明年4個紅日在周六!

有片!花絮劇照含劇透!《降魔的2.0》新舊角色、人物關係!追劇必讀