《脫單大作戰》熟女2揀1 要型男定暖男?

點先係女人嘅幸福?香港女性不乏高學歷、有能力、獨立自主又堅強,你睇中環有幾多OL著住條裙攞住把遮無其他裝備,都夠膽企上前擋催淚彈,就知香港女子有幾堅!

女人為社會爭取公義之餘,個人嘅戀愛幸福都非常緊要。日本有部爆紅漫畫近日改編成電影《脫單大作戰》,寫實咁描述咗女人對於何謂幸福嘅真實想法。故事講述漂亮迷人的網頁設計師隆子(黑川芽以 飾)一直遇人不淑,拍拖對象不是渣男就是有婦之夫。32歲的她終於醒覺,下定決心要談一次以結婚為目標的戀愛。

她用盡一切網上交友資源「徵婚」,最後鎖定兩個筍盤:一位是暖男打工仔(中村倫也 飾),另一位是型男牙醫(田中圭 飾)。在兩男的熱烈追求下,隆子竟嚐不到預期的戀愛感覺,更談不上幸福在望,隆子不禁反思:應該「婚」秒必爭還是隨緣單身?

戲中飾演隆子好友惠子嘅臼田麻美則代表婚姻柴米油鹽,瑣碎日常又唔浪漫嘅一面。對於隆子以為結婚可以逃避戀愛失敗嘅做法非常反感,間接道出女人因為到咗咁上下年紀,基於壓力而趕結婚,未有認真考慮婚後生活嘅實況,好似惠子面對婆媳糾紛,寫得相當到肉!

電影其中一個賣點係隆子周旋於田中圭與中村倫也兩個型男之間,隆子明知田中圭飾演嘅牙醫係賤男,只為逢場作興完全無意認真交往,卻依然忍唔住貪圖佢肉體,於戲內大演激情肉博戲碼!田中圭一改《大叔的愛》中傻更更嘅春田田形象,化身為行走嘅荷爾蒙,連中村都大讚佢演壞男人演得入木三分!

可幸,隆子無因為同時被2男追求沖昏頭腦,反而明白自己真正需要,搵到屬於自己嘅幸福,中間雖被色慾迷惑,好彩好快回復理智即時斬纜,意識到「沒有捷徑可走,我只是非常渴望愛情」,繼而重新評估自己,決心改變自己嘅生活。

電影香港譯名叫《脫單大作戰》,不過套戲更似想講女人除咗結婚都仲有好多出路同選擇,單唔單都可以幸福快樂嘅!