胡美貽拖攬富二代:依家係開心

東方日報
胡美貽與男友在咖啡店撐枱腳。

港姐出身的胡美貽憑豐滿身材,成為新一代宅男女神。已單身一段時間的她宣布「封盤」,戀上富二代Reeve,日前拍拖出巡,期間又拖又攬,非常甜蜜。事後她大方認拍拖:「依家係開心。」

現年26歲的胡美貽(Nicole)曾於無綫節目《3日2夜》大晒34E噴血上圍,又經常於社交網上載性感照,吸納不少宅男粉絲。她入行至今一直單身,雖然裙下之臣眾多,但仍非她所愛。

家族投資有道

原來Nicole已靜悄悄墮愛河,與從事餐飲、金融及外國地產生意的28歲Reeve拍拖大半年。據知,男方家族投資有道,最近以3.3億出售持貨70年的旺角單幢物業,名副其實大戶人家。而Reeve與不少圈中人熟落,曾在社交網上載與伍樂怡滑雪、跟JW飯敍的照片,又不時大晒名車。

日前Nicole與男友現身商場,期間撞見朋友,即停下吹一陣水,之後步往咖啡店,他們邊飲邊傾,Nicole更頻頻報以甜笑。歎完咖啡,男方搭着女友膊頭離開去Shopping。當時商場人流不多,二人即放下戒心,拖手又攬腰,細聲講大聲笑,完全沉醉戀愛世界。

揸200萬名車

Nicole於時裝店內為男友揀靚衫,但似乎不合心水,及後轉戰名店揀太陽眼鏡,不過仍是空手而回,最後雙雙到停車場,Reeve駕駛價值200多萬的名車載女友回家。事後Nicole受訪時大方認拍拖:「發展中囉,想留多啲私人空間,佢嘅背景就唔多講。依家係開心嘅,多謝關心。」

拖手行街,想唔認拍拖都唔得!
Reeve揸200萬名車接載女友。