背妻「偷食」長髮女?李龍基:老婆叫我小心

李龍基話老婆都知,仲有少少嬲,嗌佢小心啲唔好畀人影到。

68歲資深歌手李龍基疑背妻「偷食」,被爆與長髮女親熱地蹺住手在旺角鬧市行街,李龍基回應東網時笑說:「帶個女性朋友出街就大作文章,由得佢哋,我冇所謂,我行得正企得正。(你太太唔知知?)佢知,佢有問,冇乜嘢。(老婆有冇嬲你?)少少啦,佢叫我小心啲啦,唔好又畀人影到。」他又表示跟長髮女郎是認識十幾年的朋友:「佢移咗民去美國,最近佢返嚟我咪帶佢周圍行吓,如果有嘢我都唔會帶佢畀啲朋友識啦,唔需要擔心,多謝關心。」

冇試過對唔住太太

盛傳李龍基身邊有好多女性,問可有做過對唔住太太的事?他說:「梗係冇,老婆知㗎,唔係咩咁大件事,對上一次都畀人話過啦。」他更重提十幾廿年前被某報作過一單新聞,表示因為太太唔鍾意畀傳媒影相,又唔鍾意畀人知,有次與太太出街被人影相,他就隱瞞指對方是朋友個女,點知報道大大字標題指李龍基連朋友個女都唔放過,他說:「當時真係嬲到想告佢哋。」

夫妻暫時分隔兩地

他透露太太目前在深圳,而他因為工作關係,不能返太陸,因為回港後要隔離14日,同樣太太依家亦不會來港,他輕鬆笑說:「冇嘢喎,我真係冇所謂,依家係大時代,喺呢個亂世,由得人哋點講。」又表示因為駕駛中,所以不便再講電話。