【肺炎累事】賀歲7片全抽 舊片頂檔 內地電影春節檔仆直

往年初五開工,內地影業通常會公佈賀歲檔票房收入,好似過咗幾多個十億同破咗幾多票房紀錄等。去年大年初一單日就收咗14.5億人民幣票房,係近年最高!不過今年就無呢支歌仔唱啦,因為受武漢新型肺炎影響,原定上春節檔期嘅7套大片,包括《唐人街探案3》、《囧媽》、陳可辛導演嘅《奪冠》(前名:《中國女排》)、林超賢導演嘅《緊急救援》、成龍主演嘅《急先鋒》、國產動畫《姜子牙》及《熊出沒·狂野大陸》全部要抽起,另定映期。

其中3部電影有往績作參考,同係林超賢導演嘅《紅海行動》及陳思誠導演嘅《唐人街探案2》都係2018年賀歲片,2套電影分別大收36億及33億元人民幣。而2015年由徐崢主演嘅「囧途系列」之《港囧》亦收到16億人仔票房。照往績,就算打個折,幾部戲票房差極有個譜,更何況《唐人街探案3》單係預售已經過2億,絕對行情大好!

可惜幾好計劃都敵唔過疫情及國策,年廿八先嚟宣佈撤檔,宣傳費變相落哂咸水海,戲院又要即時搞退飛,無新戲唯有用舊戲頂住。結果農曆年只有上咗成個月,由陳沖、譚卓及肖央主演劇情片《誤殺》及甄子丹主演嘅《葉問4》、新少少有除夕上映嘅愛情片《寵愛》頂住。根據時光網報導,年初一內地總票房僅收得181萬,創新低!

無咗個黃金檔期,最受影響當然係被逼抽起上唔到𠴱7套新片同埋戲院。其中得《囧媽》決定自救,索性免費擺上網任睇,上架三日播放量已經有6億次!無咗十幾億票房但有機會填返下宣傳費,都不失為止血好辦法!

今次突然抽起賀歲檔,雖然無咗好多億票房,不過確實有助控制疫情。只不過電影界因此受重創,直接影響電影從業員,因為部份跟場拍戲做製作班crew,可能要等電影上完畫先出尾期,隨時收唔足人工;戲院全年收入大跌無錢交租,投資公司損失慘重,為咗止血分分鐘叫停其他電影項目,唔排除引發一輪製作公司、戲院裁員潮!

就咁睇好似只關內地業界事,其實呢批片本來安排全球同步上映,即係連北美、澳洲等院線亦受到牽連。而香港電影公司及戲院亦與內地影業有千絲萬縷嘅關係,其中不乏作為投資者或於內地營運戲院,集團收益一定受損,所以今次新型肺炎,令人為健康擔憂之外,仲要憂慮對全球電影業嘅衝擊!