肥媽豪宅後花園拎嚟種薯仔 網民睇到嘩嘩聲

做肥媽家人好幸福,成日有有機菜食。

藝人肥媽(Maria Cordero)最近開咗個視頻Channel,拍片分享平日生活。佢除咗廚藝了得外,就連園藝都有一手。日前佢分享咗一段喺屋企種菜嘅短片,令豪宅後花園曝光!肥媽位於大埔的豪華三層村屋,巿值約2000萬,用來種菜都算巴閉,香港寸金尺土,但見佢竟然喺宅入面個龐大後花園種植物,保守見到有二十種,有薯仔、番茄、葱、無花果、羽衣甘藍等,真係睇到啲網民嘩嘩聲,大叫羨慕。見肥媽真係好落力,親力親為示範點打理後花園,由翻土,除草,插秧,到施肥,都落手落腳自己做,地方咁大真係睇到覺得辛苦。

對於網友直呼羨慕,肥媽回覆東網稱:「我都係租人地方種菜啫,大概4千幾蚊!其實依家肺炎肆虐,人人都少出街,如果屋企有個咁嘅小花園,足不出戶,享受吓種菜呢啲冇壓力嘅生活都幾寫意!」

此外,肥媽喺馬來西亞沙巴都有間複式豪宅,不時一家人飛去度假。佢之前仲拍片帶大家嚟個House Tour,客廳擺有多件古董傢俬,佢透露幾乎全部都由香港專誠搬嚟,當中有些更係媽媽留低嘅,猶如嫁妝一樣甚有紀念價值。而對於熱愛下廚嘅肥媽,廚房當然一應俱全,肥媽仲大晒恩愛,話老公Rick為咗方便佢唔使踎低搵廚具,特意為佢設計一幅「煎pan牆」,羨煞旁人!豪宅入面仲有升降機、面對無敵美景嘅露台泳池,相當豪華。