老馬有火!88歲奇連伊士活 自導自演阿伯販毒事件

88歲嘅老牌荷李活演員兼導演奇連伊士活(Clint Eastwood )老而彌堅!新作《The Mule》唔止做導演,仲親身上陣做埋男主角。雖然年過80不過體力同創作力同樣驚人,近年導演作品無間斷過,好似2014年《美國狙撃手》(American Sniper)、2016年《薩利機長:迫降奇蹟》(Sully) 叫好叫座,今年剛上映有《The 15:17 to Paris》,年尾仲有呢套《The Mule》。佢對上次揹飛坐正做男主角已經係2008年、同樣由佢自導自演嘅《驅.逐》(Gran Torino)。

奇連伊士活執導作品嘅政治取向明顯,而且近年幾套作品,如講述軍事成就極高嘅軍人患上創傷後壓力症侯群、最後被同樣係退伍軍人槍殺嘅《美國狙撃手》;緊急降落河道救返全機乘客性命、但於聽証會不斷被質疑嘅《薩利機長:迫降奇蹟》等,都講緊「何謂英雄」呢個命題。作品仲指出官僚嘅冷血、一無是處、得個講字無做實事!無獨有偶幾套電影都係真人真事改編,今次《The Mule》都唔例外。

《The Mule》以二戰老兵Leo Sharp嘅故事為藍本。故事講述80有多嘅Earl Stone (奇連伊士活 飾)生意失敗負債纍纍,連間屋都接近被銀行沒收,就係呢個時候有賺錢機會送上門︰只要幫人送貨就有錢賺,當然份人工可觀自然有返咁上下風險,就係幫墨西哥毒犯運毒,仲要幾斤幾斤咁運!咁大單買賣同時引起緝毒人員(Bradley Cooper 飾)嘅懷疑並展開追查。

睇完個故事就明哂點解奇連伊士活要自己演埋︰80幾歲、退伍軍人仲咁有guts明知犯法都幫黑幫運毒,啲咁有火嘅硬漢角色,除左佢自己之外都唔知搵邊個做好!現實中嘅男主人翁Leo Sharp喺2011年87歲高齡被捕,真係唔好睇少老友記,幾大年紀都一樣可以好有殺傷力!

不過拍成電影,唔係為左歌頌Leo Sharp,應該係借其故事宣揚家庭價值。因為最新電影預告片就好清楚咁講左「家庭是最重要,唔好學我咁,將工作放喺家庭前面」(Family’s most important thing. Don’t do what I did. I put work in front of family.) 。

計我話奇連伊士活名氣、錢財、地位、獎項樣樣齊,好多人有齊呢4寶會選擇退休不問世事,或者享受光環做seafood,但奇連伊士活無,仲依然好有火咁用電影炮轟人性黑暗面、僵化嘅制度,令人敬佩!淨係呢道「老馬之火」已經夠哂吸引力。