老公鍾麗淇傍到實 梁靖琪佗B照踩高踭鞋

梁靖琪佗B出席活動,老公Jon同老友鍾麗淇(右圖右)「左右護法」傍住佢!

藝人梁靖琪(Toby)與老公施雋賢(Jon)、鍾麗淇(Margaret)及蔣怡等日前到中環出席香港女律師協會晚會,籌款拯救柬埔寨雛妓,當晚每籌得八千港元便可以為當地兒童在學校提供一年教育。

剛宣布懷孕的Toby身穿紅色晚裝及三吋高踭鞋赴宴,老公Jon與好姊妹Margaret全程化身「左右護法」傍實。宣布佗B後首次出席公開活動的Toby說:「呢個慈善機構對我嚟講好重要,係老公介紹畀我識,今次創辦人仲特登嚟咗香港,覺得好有意義,加上今次係女律師協會搞嘅慈善晚宴,由一班女仔凝聚一齊去做事更加別具意義,希望可以籌多啲錢幫到更多小朋友。」她又指即將榮升媽媽,特別關注小朋友的教育:「知道慈善機構有創辦專門嘅學校為有需要嘅小朋友提供免費教育,依家有超過500個學生,希望各位善長慷慨解囊。」

講到健康情況,Toby表示狀態很好,故身體力行支持慈善,為BB進行胎教:「依家習慣每個星期會同老公去教會,每晚都會祈禱,希望BB聽多啲我哋講嘢,帶佢做多啲慈善工作,今年因為要留喺香港安胎去唔到柬埔寨再做探訪,不過已報咗名下年再去,唔知到時會唔會帶埋小朋友去做義工呢?」問到老公可有對她穿高踭鞋有微言?Toby笑說:「我老公非常煩,由我開始話要着高踭鞋之後,佢就上網係咁睇孕婦幾時唔着得高踭鞋,係咁叫我買過對鞋,所以今晚我行去邊,佢應該會跟我去邊,哈哈!」

至於同樣為慈善出心出力的Margaret,自稱客串做Toby的「一晚助手」。已是兩女之母的她表示有跟Toby交流湊B心得:「我同佢講湊仔永遠都係一個謎,每個小朋友都唔同,不過Toby好多湊仔經驗,我兩個女係佢契女,湯盈盈嗰兩個都係佢契女,加上有咁多朋友係身邊照顧佢,應該冇問題啦!」