【翻身有望!】沙拉保夫自編自演新作Honey Boy有望入圍斯卡

童星出身嘅美國男星沙拉保夫,因為2007年《變型金剛》走紅,不過人紅是非多,圍繞佢嘅新聞以醉酒、醉駕被捕,又或者關於佢啲行為藝術,好似2014年參加《性上癮》柏林電影節首映禮時,用個寫咗「I’m not famous anymore」嘅紙袋笠住自己個頭,形象插水,搞到電影公司怕怕,近年電影作品少之又少。

沙拉保夫曾經於訪問時提到佢嘅古怪行為,係源於童年創傷變得極度無安全感,積極治療後似乎情況有好轉!不過暫時未有大製作搵上門。既然無人搵佢拍戲,佢就自己寫套戲俾自已做主角,作品叫Honey Boy。

套戲仲入咗辛丹斯電影節,本來以為係gimmick嘢,點知班影評人睇完大讚,講到係沙拉保夫翻身之作,仲話值得提名奧新卡最佳原創劇本同最佳男配角!

沙拉保夫以自身經歷寫成Honey Boy,講述自己與父親以愛之名實為害嘅關係,退伍軍人父親有暴力傾向又有性罪行案底,無自理能力仲成日對個仔郁手郁腳,一家人生活拮据,直至沙拉保夫開始拍戲賺錢,生活先有改善。Honey Boy分別用咗《無聲絕境》童星Noah Jupe同《迷失家緣》主角Lucas Hedges飾演童年及年輕嘅自己,而沙拉保夫就飾演佢個酗酒又家暴嘅父親。

Honey Boy係沙拉保夫接受治療期間寫成,將自身傷痛轉化成藝術創作,挖出內心深層一面亦令呢個劇本非常有張力,從中我地感覺到佢嘅不安同傷痛如何形成,亦令我地再次見返呢位演員嘅才華。

辛丹斯影展後Amazon買咗套戲版權,所以香港觀眾好大機會,未來會喺串流平台或戲院睇到。