翠如爆唐詩詠甩難大把人追

東方日報
黃翠如與林文龍新劇反應咁好,梗係要落力宣傳!

「明湯戀」全城關注,閨蜜黃翠如趁機會為唐詩詠解畫,稱她一切安好,可謂得到解脫,不用再被外間將她與馬國明放在一起,笑言詩詠好多人追!

藝人黃翠如和林文龍昨日在電視城為無綫劇《那些我愛過的人》宣傳,有見馬國明與湯洛雯拍拖得到全城祝福,問到視馬國明為男神的翠如有何感受?她坦言很開心,並表示與老公蕭正楠都估到蛛絲馬迹:「我哋係估到,但唔出聲,留番佢哋講,但都恭喜同祝福佢哋,男神配女神,簡直完美!」

「明湯戀」曝光前,外間一直認為馬國明應該和唐詩詠在一起,但詩詠閨蜜翠如卻幫口解畫,問到詩詠有冇嬲?翠如說:「冇!佢好好,咁仲好啦,以後唔好再夾硬將佢兩個擺埋一齊,其實佢好多人追,我叫佢慢慢揀,大家亦唔好再幻想佢嘅情緒,佢非常好!」

黃嘉樂唔驚馬國明爬頭

至於《那》劇反應好,文龍和翠如得到不少觀眾和同事力撐,翠如稱有不少前輩對她改觀而感動:「呢個反應真係估唔到,咁多自己公司人睇,真係好難得!佢哋話對我有改觀,所以佢哋都來個抱抱鼓勵我!(老公有冇睇?)佢有!」

同場的黃嘉樂被問到未能在《鐵馬》家族電話聊天群組中,第一時間知道馬國明拍拖喜訊可有不悅?他說:「馬國明性格向來唔鍾意講感情事,所以我哋唔會問,同埋我哋個群組都唔講呢啲嘢。(隔咗幾耐先知?)可能係群組其中成員林子善有啲扭計話唔知後,隔一個鐘左右知啦!(對阿嫂印象?)我哋唔熟,但佢好靚女囉!(期待見面?)睇適當時候,希望佢會帶阿嫂出嚟啦!」至於《鐵馬》群組另一喜事,問到可知鄭嘉穎再做爸爸?他說:「呢個知喎!(送咩顏色衫畀BB?)等佢哋BB出咗嚟先決定啦!(幾時到你有喜事?)擺酒成本都幾重,又要畀訂金先……(怕馬國明快過你嗎?)咁咪好囉!」

唐詩詠、馬國明
黃嘉樂都戥馬國明開心!