【美女嫁野獸?】空靈女星蒼井優有咩代表作?

今日日本影壇最震撼消息,一定係「空靈女神」蒼井優結婚嘅新聞!蒼井優入行18年,一向同氣質、空靈、好演技等字眼掛鈎。蒼井同過型男拍拖,網友對於佢閃婚消息甚為震驚,可能點都估唔到女神最後情歸搞笑藝人山里亮太,拍拖2個月就決定同佢步入人生新階段!

女神配男神好似理所當然,不過蒼井優屹立影壇多年,仲係唔少導演嘅繆思(muse,靈感女神是也),對擇偶以及人生一定有深刻體會同獨特見解,山里亮太一定有過人之處先可以令蒼井優付託終生!趁今日天大喜訊,等我地一齊回味下女神銀幕化表作!

岩井俊二最先相中蒼井優特氣質,由01年嘅《青春電幻物語》到04年嘅《花與愛麗絲》都大放異彩。電影亦見到導演對佢嘅偏愛,明明係2位少女青春故事,2個都係主角,但片尾一段蒼井優腳套紙杯跳芭蕾舞嘅獨腳戲,將其清新嘅氣質放大致極致,而唔少觀眾都因為呢一幕從此記得「蒼井優」呢個名字。

《草裙娃娃呼啦啦》呢套電影,當年喺香港上映時無引起好大話題。故事講述福島縣小鎮沒落,決定轉型為夏威夷度假中心嘅成立過程。蒼井優飾演其中一個加入舞團努力學習草裙舞、擁抱改變嘅少女,演活看似平凡但堅毅嘅角色。電影為佢帶來演技大獎,包括第30屆日本電影金像獎最佳女配角及藍絲帶最佳女主角等。

「森林系」、「空靈」、「純情」嘅蒼井優努力開闊戲路,近年有意擺脫清新形象,接拍人渣角色,例如於《烏獸行》飾演周旋於3男之間嘅十和子,嚮往不切實際的愛情,即使有了包食包住的陣治(阿部貞夫 飾),仍與拋棄她的前度黑崎(竹野內豐 飾)藕斷絲連,同時又搭上人夫水島(松坂桃李 飾),戲內不乏大膽床戲,連蒼井優都頂唔順十和子,覺得個角色勁討厭!

蒼井優做配角客串嘅作品都唔少,喺《乒乓情人夢》嘅演出仲搶眼過女主角新垣結衣。佢飾演中國餐館侍應兼乒乓球手,超級無禮貌又粗魯仲潑辣油,玻璃心嘅同胞唔睇得,不過我好佩服佢處理角色細節咁到肉,成為《乒》嘅神來之筆!