羅霖不擔心疫症爆發 每月仍飛內地三次行騷:藝人必須去內地工作

羅霖不擔心疫症爆發 每月仍飛內地三次行騷:藝人必須去內地工作

羅霖(Candy)今日(7日)出席化妝師Will Or的化妝學校開幕儀式,向來有「美魔女」之稱的她當然對化妝甚有心得:「依家唔流行啲厚重嘅妝容,流行啲好薄好自然嘅,所以底妝必須化得好薄,如果化得太厚就會keep得唔耐,尤其我哋拍劇嘅時候,如果先用打底霜打底就可以保持20至30個小時。」她笑言想比起化妝叻,勤護膚才是最重要:「皮膚保養得好自然唔化妝都靚,而保養皮膚有三大要點,清潔、保濕、同防曬。」

Candy多年來都相當貪靚,她笑言自己很幸運得到很多品牌贊助或贈送護膚品,所以自己節省一大筆龐大開支每年至少七位數字:「你諗吓如果做機閒閒地都要十幾萬,如果保持身形或者皮膚都有人幫我,你話係唔係慳到七位數字呢?」她表示除了女士要適當地貪靚,男士亦應該注重皮膚健康,尤其是她的三個兒子:「尤其是佢哋青春期嘅時候,男仔嘅皮膚都好重要,唔係話鼓勵佢哋要好貪靚,我唔鍾意佢姿整,但必須要清潔同整潔,畀人感覺舒服,所以我喺屋企有時都會幫佢哋做針清,但係如果清得唔好好容易毛孔粗大同有凹凸洞,所以我搞唔掂就會帶佢哋去美容院!」

近日武漢爆發多宗不明原因肺炎,本港亦陸續出現由武漢回港後出現疑似症狀的個案,令市民感到相當憂慮。近月Candy多次飛往內地參與時裝騷行catwalk,她表示會好好注意健康,多飲暖水、多睡眠、補充維他命C、在飛機戴口罩等措施來保護自己。她坦言自己作為藝人無法避免前往內地:「我哋做藝人必須去內地工作,因為香港依家嘅經濟情況好多工作都取消咗,所以內地係我哋好大嘅市場,嚟緊我諗每個月都要飛三至四次內地。」

點擊瀏覽《香港01》更多內容和圖集

你可能感興趣:
程瑤孖羅霖率「仁美清叙」練歌 為重組十周年晚宴做足準備
【書展2019】女星寫真混戰展開揭幕! 邊本最有力突圍?