羅天宇否認同陳瀅拍拖

東方日報
張名雅短裙仔騷腿,不愧為索媽!

無綫藝員羅天宇、張名雅、賴慰玲等昨日在深水埗為熱播劇《幸福一家人》宣傳。羅天宇最近被發現與陳瀅同遊日本,他否認戀情:「唔係拍拖,亦冇機會發展。我哋成班人一齊去,當時都知道有遊客影相,但冇辦法。」而他與「前度」湯洛雯一起拍攝的旅遊節目將出街,他指節目拍得好舒服,十分自然。問到可有翻撻機會?他說:「暫時唔諗呢啲,工作行先。」

講到父親節,張名雅指老公擺了烏龍,未能與兒子在正日慶祝:「老公安排咗個Surprise Trip同我二人世界去韓國,點知後來先發現撞咗父親節,但冇辦法,都已經Book晒嘢,惟有提早慶祝。」她又透露已經與無綫續了新約:「我大肚嗰陣時公司已經搵我傾,去到坐月,公司速遞咗份新約畀我簽,我又速遞返去,大家都好有誠意,預計9、10月會開劇,到時要屋企人幫手湊仔。」問到可有加人工?她說:「錢唔係最重要,最緊要係講心,我係2012年港姐,如果冇TVB都冇我。」

羅天宇宣傳劇集,大擺甫士。