羅仲謙載楊怡母女圍城撲糧

東方日報
楊怡同媽咪着母女裝出動!

近日吐露港公路被堵塞,家住大埔的楊怡連日來外出難免受影響,但羅仲謙相當貼心,趁新劇已煞科,前日載老婆及外母掃貨儲糧。阿怡負責在超市入貨,但發現想買的貨品被搶購一空,惟有折返家中,謙仔之後再接外母出發去街市買餸,以免餓親她們!

阿怡與謙仔結婚兩年多一直恩愛,多次開口明言等「有B喜訊」。謙仔原本打算拍畢無綫劇集《木棘証人》後就停工,全力造人,不過煞科後即告病倒發高燒,他在老婆阿怡悉心照顧下接近痊愈,卻慘變「鵝公喉」,認真慘慘豬。

飛撲幫外母拎餸

連日來因交通關係未有離開大埔的阿怡及謙仔,為儲糧終於出動。前日下午1時許,謙仔病住出車,接載穿粉紅色卡通母女裝的阿怡及外母往屋苑附近的超市掃貨,可惜貨架空空如也。阿怡行到蔬果部打算買水果讓老公吸收維他命戰勝病魔,但揀唔啱心水,無奈折返家中。

下午4時許,謙仔再次出動,接載外母往大埔墟街市買餸。由於附近較難泊車,抵埗後謙仔負責睇車,外母則做「買手」,四出選購新鮮蔬菜及肉類,未幾已買到大袋小袋,其中包括大袋水果。她掃貨後折返停車處搵女婿,體貼的謙仔見到外母即急急落車,幫手接過所有戰利品,安頓好就開車打道回府,同老婆及外母玩煮飯仔。

同住有食神

據悉,謙仔與阿怡婚後一直與外母同住,彼此相處愉快,曾向外大讚猶如多了一個母親,並對其廚藝讚不絕口,自覺相當有口福。而阿怡近月未有接Job,開始跟媽媽學習烹飪,羅家廚房近日認真熱鬧!

外母滿載而歸,謙仔即時飛撲落車幫手。
揀完一輪,楊怡都係買唔成水果。
楊怡近日未有開工,等待謙仔煞科後就全力造人!