羅仲謙留鬚接禁令只准錫腳板

東方日報
羅仲謙忙住拍劇賺奶粉錢,冇幾可陪「小珍珠」。

藝人羅仲謙近日趕拍劇,3日只睡了10小時,笑言要靠睇囡囡「小珍珠」的照片提神。他透露囡囡早前發燒,令他和老婆楊怡擔心不已,幸已無大礙。由於拍劇滿臉鬍鬚,他已被下「禁錫令」,免得拮痛囡囡!

宣萱、陳豪、羅仲謙、洪永城及滕麗名等,昨日出席新劇《陀槍師姐2020》開鏡拜神,場面熱鬧。謙仔提到女兒「小珍珠」即一臉幸福,毫不掩飾自己是「女兒控」:「最近拍呢套劇已經3日3夜冇好好瞓過,加埋瞓得10粒鐘,不過當老婆Send個女啲相畀我睇,我就即刻精神晒!」

怕「小珍珠」唔認得

謙仔表示日以繼夜開工,每當收工回家,女兒早已入夢鄉:「驚個女就嚟唔認得我,況且依家我滿面鬍鬚,屋企人唔畀我錫個女塊面,話我啲鬍鬚同埋頭髮會拮親個女,所以我只可以錫佢腳板底!」又透露「小珍珠」日前微燒,令他大為緊張:「雖然只係輕微發燒,但我好唔安樂,即刻抱佢睇醫生,答案都係『不明原因』,但冇事喇,依家終於明白做父母嘅擔心。」此外,他自爆劇中動作戲連場,上山下海無一幸免:「嚟緊仲會講我由8樓一躍而下,有啲鏡頭會親身上陣,不過盡量小心,唔想老婆擔心。」

宣萱陳豪歎慣呻辛苦

至於宣萱與陳豪今次拍攝輕鬆,宣萱笑言:「相比起羅仲謙佢哋打戲連場,我哋真係好舒服,而且主要喺室內歎冷氣,辛苦嘅留番畀啲後生做。」陳豪亦笑說:「我哋都辛苦……笑得好辛苦,不過呢啲歡樂係我哋用多年嘅血汗捱番嚟o架!」

宣萱透露本月26號完成最後一日拍攝後會先休息,雖然不能旅行,但亦會約朋友見面,並自爆:「之前我哋各自開飯,用應用程式喺網上見面,一餐飯食足3個鐘!」又笑指陳豪成功「導」她飲咖啡:「同佢講要去佢舖頭飲,順便幫佢督促店員開工。」

宣萱(左)、陳豪及滕麗名較少打戲,相對輕鬆。
陳庭欣(左)着長袖連身裝,不及穿背心裙的何依婷養眼。
黃美棋晒膊頭,造型青春。