羅仲謙人夫細膽 張曦雯夠薑

東方日報
張曦雯每年都會搵高人指點迷津。

羅仲謙與張曦雯結伴「捉鼠」賀新歲!二人均表示很喜歡到樂園,重拾童真。謙仔坦言娶老婆後變得細膽,很怕玩機動遊戲,相反張曦雯勁夠薑,最愛玩離心力強勁的過山車。

羅仲謙與張曦雯(Kelly)早前合拍無綫劇《木棘証人》而成好友,二人日前到主題樂園齊齊「撈起」,祝願香港市民鼠年風生水起。謙仔童心未泯,遊園時表現雀躍,但他自爆:「依家對機動遊戲愈嚟愈細膽,可能因為有頭家,明白要確保自己安全,先可以照顧身邊人。」Kelly則自稱藝高人膽大:「我同細佬好百厭,以前玩過山車特登坐低啲,等安全帶冇鎖得咁實,過山車開動時嘅離心力會勁啲!」

習慣犯太歲

肖鼠的謙仔對於「本命年」豁達面對:「其實近呢5年習慣咗不停『犯太歲』,只係程度唔同,所以每年都要攝同還太歲。」並指渴求平淡是福,只希望自己及身邊人都身體健康。問到何時生B?他笑言:「努力緊,隨緣啦!」至於「鬼妹仔」Kelly篤信風水命理,每年會找高人指點迷津。在剛過去的台慶頒獎禮勇奪「飛躍進步女藝員」,正行事業運,她說:「中國人過年都希望有Luck,師傅話我今年運程OK。」

嘆傳統小食失傳

談到最難忘的農曆新年,Kelly笑言:「一定係我當選芝加哥華埠小姐嗰年,因為要代表去唐人街參與花車巡遊,當時天氣寒冷,我衣衫單薄仲要好高興咁喺花車上向途人揮手,真係有苦自己知!好彩屋企人嚟支持我。」至於在大埔圍村長大的謙仔慨嘆,過年的習俗與熱鬧已不復以前:「細個過年會舞龍同食盆菜等,依家所有傳統習俗規模都縮細晒,人大咗好似連人情味都淡咗!最可惜係好多傳統小食已經失傳,冇可能再重溫兒時嘅美味回憶。」

場地:迪士尼樂園

謙仔自稱有望攞「終身成就獎」,令張曦雯哭笑不得。
謙仔坦言恨做老竇。
二人祝大家鼠年行大運。