續集預埋黃心穎 張振朗:唔使佢講對唔住!

東方日報
張振朗與劉溫馨劇中有感情線。

黃心穎近日終於「蒲頭」,在網上留言感謝劇集拍檔體諒,又聲稱對於幾乎令劇集未能出街而自責。同劇的張振朗出席宣傳時說:「佢唔需要再同大家講對唔住,唔好再怪責自己。」

無綫台慶劇《牛下女高音》演員吳岱融、龔慈恩、張振朗、蔣志光、車婉婉與歐瑞偉等昨日在將軍澳電視城為劇集星期五晚大結局宣傳。因偷嗒人夫許志安而「神隱」七個月的黃心穎,近日在網上蒲頭留言「喊驚」,自責幾乎連累劇集未能播出,又感謝同劇演員體諒。對此,張振朗說:「佢唔需要再同大家講對唔住,套劇已經播緊,反應仲咁好,希望佢唔好再怪責自己,大家畀啲空間佢。」吳岱融則讚張振朗與黃心穎劇中有火花:「總算冇被比下去,心穎畀咗好多努力去做。」

講到眾演員希望原班人馬開續集,張振朗笑說:「我哋自high吓啫,當然好想,因為我喺劇裏面同班中佬好少對手戲,好想同佢哋學嘢。」至於可希望黃心穎拍攝?他說:「公司決定,我只係低級藝員,話唔到事。」吳岱融則笑言希望觀眾保持熱情,給公司壓力開拍。

吳岱融:套劇係好多人嘅心血

另外,龔慈恩指於劇中對「丈夫」吳岱融很嚴厲,笑言希望下次能有多點溫馨戲份,最重要是帶給觀眾正面訊息,並說:「劇中講我有BB,最初睇劇本唔係咁接受,點知有日返到公司,化妝姐姐就話要同老公試吓。」吳岱融即笑說:「儲埋咗幾十年,可能會精啲,總之有愛就要努力去做。」他又希望大家多點包容,公私分開,期待黃心穎能拍攝續集。講到心穎的留言,他說:「如果係我都會咁諗,因為套劇係好多人嘅心血,依家出到街,仲好多人鍾意,放心,冇事嘅!」