【繼《城寨英雄》小智】李日昇《棟仁的時光》扮演亞氏保加症患者再獲網民讚賞

李日昇係邊個?如果淨係講個名,大家可能唔係好知道,不過如果話你知佢就係《城寨英雄》入面嗰個小智,大家應該對佢有啲印象。佢今次喺《棟仁的時光》中飾演鍾尚姿(趙希洛飾)弟弟鍾尚正一角,劇中患有亞氏保加症,不善與別人溝通,感覺好瘦削。不過佢學習能力好高,好快已經學識沖咖啡。唔少觀眾都覺得李日昇今次演技非常好,將角色發揮得淋漓盡致,演技絕對係超晒班!

其實李日昇之前喺《城寨英雄》飾演患有智障嘅小智已經做得好似,仲講咗句「強者係為保護弱者而生存」嘅說話,令網民見到佢都會眼濕濕,仲獲網民力讚「傻得出色」,估唔到今次亦做得咁好。

李日昇六歲以童星身份出道,入行差唔多二十年,佢細細個已經係導演杜琪峯常用童星,同多位影帝級男星拍過戲,仲曾經喺電影《黑社會》中做過任達華個仔。除咗拍電影,佢仲經常拍片香港電台教育電視節目,及電影節目,所以佢拍戲經驗絕對唔少架。