細細粒開Live直播挑戰食五人份量日本菜

陳嘉佳(細細粒)一向都好鍾意拍片影相po去社交網站,同大家分享佢嘅生活同工作點滴。日前,最鍾意吃日本料理嘅細細粒以《老表你好hea》嘅Vivienne打扮去咗朋友新開張嘅餐廳捧場,仲開直播俾大家睇住佢食嘢,挑戰自己可以食到幾多,期間吸引唔少網民留言。

當日,細細粒開咗超過1小時名為「小寶帶你食好嘢 - 挑戰大胃王」嘅直播,喺片中見到枱面上擺滿大概4至5人份量嘅美食。喺整個直播過程中,細細粒一邊食一邊同網民傾計兼唱咗幾句《女神》,期間仲邀請其他餐廳請佢去挑戰,仲話平時可以60隻生蠔都冇問題,希望有餐廳可以俾佢挑戰100隻生蠔。

細細粒喺唔使1個鐘已經成功挑戰將枱面上嘅食物KO,最後仲食埋雪糕,真係好犀利呀!唔少網民睇直播都紛紛留言問細細粒問題:「平均幾耐食一餐」、「食完呢餐仲使唔使食晚飯」、「你平時下午茶都食咁多?」、「平時可以食幾多碗飯?」等等。

細細粒食晒成枱食物又食得咁開心,唔知大家覺唔覺得好治癒呢?