細數近年女神級無綫天氣報告主播

有靚女睇就係人都鍾意,但真係估唔到原來報告天氣嘅竟然美女如雲!

陳嘉倩喺報告天氣之前,分別喺NowTV同無綫做新聞主播!早兩年佢就重回校園,冇得睇佢報天氣啦!不過靚女又有知名度,廣告商又點會放過呢?而我哋就只可以喺廣告先見到佢啦,又或者大家勤力啲的話,去浸會大學讀返個學位,睇吓有見唔見到佢?

陳嘉倩
陳嘉倩

因為時常穿着有蝴蝶圖案服裝嘅張文采,被網民稱為「蝴蝶公主」。不過呢位公主就比較多是非,做新聞主播期間就曾經被新聞部經理因為條裙太短,被罰星期一至五晚間嘅新聞提要停賽一個月。另外,有被傳同另一新聞主播黃紫盈發生罵戰,令到黃紫盈直播期間落淚!不過上年已為人妻嘅佢,簡簡單單報吓天氣,咪大家都開心囉!

張文采
張文采

講到天氣女郎就不得不提黃婉曼。可能大家都未必知道黃婉曼其實係藝名,佢真正名字叫做粘冰冰。其實黃婉曼都真係一個叻女,喺大學時期攞到助學金,而且亦都有客串多個報章專欄,佢更一度主持足球節目以及綜藝節目。而家相夫教子嘅佢,仲開咗兩間麵包餐廳。真係好懷念當年睇天氣報告佢生動風趣嘅風格呀!

黃婉曼
黃婉曼

梁凱寧幾乎無綫嘅新聞節目都有佢份,佢除咗樣子甜美之外,最多人談論嘅就係佢嘅身材。喺《天氣報告》見到佢,就算天氣有幾惡劣,心情都唔會差得去邊。不過好景不常係今年嘅九月佢以一句「新聞報道完,多謝支持,各位再見。」作結,大家暫時都見佢唔到住啦,因為佢呢個月已經去咗斯里蘭卡做義工,主要係喺托兒所照顧嬰幼兒,同埋去鄉村教小學生英文。

梁凱寧
梁凱寧

黃紫盈就真係一個好能夠代表國際化香港嘅代表。曾經到柬埔寨做義工,有去過日本留學,再到台灣交流實習,之後仲要到英國劍橋大學進修。除咗《天氣報告》之外,懂得四文三語嘅佢轉向生活時尚及旅遊節目方向發展。不過可能大家最深刻嘅就係佢一個訪問節目《都市會客室》當中訪問梁振英,而且透露當時嘅參選特首意向。

黃紫盈
黃紫盈

曾經被網民稱為「新聞女神」嘅黃麗幗,除咗做過新聞報節目之外,就連兒童節目佢都做過。不過有時真係估唔到天氣女郎除咗美貌之外,就真係臥虎藏龍。黃麗幗離開無綫之後,佢就出任咗投資策略公司嘅副總裁。今年初佢再度結婚,希望佢可以事業愛情兩得意啦!

黃麗幗
黃麗幗