簡幗儀圖人不符被恥笑

東方日報
簡幗儀高貴優雅,是不少男士的夢中情人。

美女設計師簡幗儀每日都上載示範華衣美服的照片,予人知性美典雅感覺,但她笑言自己個性滑稽,私下常不經意放笑彈,被好友恥笑更遭男友「嫌棄」。

美女設計師簡幗儀(Lilian)曾推出多本唯美寫真集,分享設計裝束及配搭心得,是不少男士的夢中情人,女士也爭相倣效,雖然Lilian予人感覺高雅,她笑言性格有搞笑一面,在朋友間常放笑彈:「我面對識得耐嘅朋友,同平時工作Mode完全唔同,佢哋話我成日做埋啲古怪嘢,會恥笑我!」

搞笑多過性感

問到會否在鏡頭前展現搞笑一面?她表示之前曾客串演出影視作品,但導演始終覺得她比較適合典雅角色:「其實我好欣賞吳君如呢類喜劇演員,令大家好歡樂、好親切,我唔介意引人笑,但面對鏡頭始終有啲緊張。」又說男友覺得她搞笑多於性感:「佢話我騎呢同搞笑,似細路女多啲,我平時影相知道擺咩甫士、着咩衫會有性感感覺,但如果睇番花絮就會覺得好笑,影完相我就破功o架喇!」

出香氣寫真

曾推出四本寫真的Lilian,去年斷纜未有新作,她解釋正在趕工,希望於農曆新年前後推出:「今次同韓國化妝師合作,影好晒相,係爭啲文字,呢次主題係香味,我會送四支香水,希望讀者睇書之餘仲聞到香氣,多一份體驗。我覺得氣味同回憶掛鈎,聞到一啲味會令你諗番起某啲事。」直言女士噴適當香水可以提升自信,男士亦要注意體味,保持整潔,「臭男人」絕對會扣分!

Profile

身高:1米67

星座:巨蟹座

興趣:花藝、畫畫

私底下的Lilian鍾意搞笑,真係估佢唔到!