答案呼之欲出!伍詠薇爆某前輩衰嘢:鍾意扮五虎

鍾意學五虎其中一個!

由伍詠薇(伍姑娘)同林盛斌(Bob)主持嘅節目《Tiger's Talk》,邀請一班《飛虎之雷霆極戰》演員上去傾偈,分享拍劇及生活事。日前一集就請到苗僑偉(三哥)、黃宗澤(Bosco)及吳卓羲(Ron)擔任嘉賓,當講到「難忘的前輩」時,估唔到最爆嘅嘢係喺伍姑娘口中而出!

伍姑娘話:「當時喺娘家(亞視)過嚟呢邊…」隨即模仿對方神情動作:「咁我唔講邊個喇!」吳卓羲即笑言:「好神似喎,應該係嗰個囉!」仲大爆對方「威水史」:「唔會教㗎,直情可能係嚟到慢慢講囉,講錯咗再嚟過,你濕晒你嘅事,或者佢會唔到、遲到、失蹤或者8個鐘頭後先返工都係咁樣!」眾人即時追問係邊個時,伍姑娘就話:「我講你聽我死梗喇!」而對方係依然尚在嘅!

之後伍姑娘再扮當事人Chok爆表情,吳卓羲就笑話咁Chok一定係林峯啦!伍姑娘喺大家推波助瀾下,再對住三哥講:「你五虎有邊幾個呀?其中一個,嗰個人好鍾意學佢(五虎其中一位)嘅,唔講邊個喇!」吳卓羲都即刻Get到係邊個,伍姑娘再補充:「以前好衰呀,不過依家好好人,以前真係彩你都傻,見到你哋呢啲後輩,話知你死,望都唔望你一眼,我真係心諗『吓』!」Bob再問:「係咪兩個字㗎?」伍姑娘聞言即反白眼:「死啦今次,人哋冚家嚟打我咁點呀?」答案唔使講似乎呼之欲出喇…