第三屆「觀眾在民間電視大獎」得獎名單出爐 馬德鐘黃智雯成為民選視帝視后

嚟到年尾,又係頒獎禮嘅季節,無綫舉辦嘅《萬千星輝頒獎典禮2018》將於周日(16日)舉行,除咗「最佳男主角」和「最佳女主角」競爭激烈之外,多個獎項同樣爭崩頭,成為網上熱門討論話題。當中7個主要獎項,包括「最佳劇集」、「最佳男主角」、「最佳女主角」、「最受歡迎電視男角色」及「最受歡迎電視女角色」等等都由全民及無綫評委會投票選出。雖然大家可以投自己嘅心水,不過過往都有唔少爆冷賽果,好似上屆「最佳劇集」由黑馬《誇世代》奪得,令觀眾驚訝。

既然《萬千星輝頒獎典禮2018》就快舉行,早前有Facebook專業率先搞咗一個全民投票嘅「觀眾在民間電視大獎」,賽果亦已經公布,所有名單都係由全民提名及全民投票產生,百分百民意。「觀眾在民間電視大獎」已經嚟到第三屆,而家就同大家講下15個獎項嘅得主啦!

無綫喺15個獎項中囊括14個獎項,當中處境劇《愛 ‧ 回家之開心速遞》奪5獎,包括「民選最佳劇集」、「民選最佳男配角」、「民選最佳女配角」、「民選最佳戲劇拍檔」及「民選最佳劇集橋段」,成為大贏家。ViuTV嘅《Goodnight Show 全民造星》力壓《周遊東京》奪「民選最佳綜藝資訊節目」,成為無綫以外唯一得獎節目。

民選最佳劇集 :《愛 ‧ 回家之開心速遞》(TVB)

無綫處境劇《愛 ‧ 回家之開心速遞》播出以來,無論口碑同收視都好過唔少劇集,唔少劇中角色已經成功入屋,幾pair情侶更加奪得廣大網民歡心。今次劇集力壓《三個女人一個「因」》、《跳躍生命線》、《救妻同學會》及《BB來了》奪得民選最佳劇集,都可以話係實至名歸。

民選最佳劇本:《三個女人一個「因」》(TVB)

由黃智雯及袁偉豪主演嘅《三個女人一個「因」》,就算安排喺周末播放,但收視率拍得住黃金時段嘅劇集。劇情主要講述方以因(黃智雯飾)係城中知名嘅大律師,原本事業愛情兩得意,但竟然患有多重人格症。劇集題材特別及新穎,成功得到觀眾喜愛。就算經常玩二次創作嘅《愛 ‧ 回家之開心速遞》、大熱醫療劇《跳躍生命線》、青春偶像劇《救妻同學會》及一眾港媽歡心嘅合家歡小品劇《BB來了》都輸俾佢呀!

民選最佳男主角:馬德鐘 - 麥在田《跳躍生命線》(TVB)

每年大家最關心嘅獎項一定係視帝同視后,今屆民選視帝由喺《跳躍生命線》飾演「在哥」麥在田嘅馬德鐘奪得。相隔2年重返無綫拍劇嘅「馬神」馬德鐘,今次喺劇中飾演救護員總隊目入型入格,演技獲得大家認同,成功揮低《逆緣》陳家樂、《三個女人一個「因」》袁偉豪、《宮心計2深宮計》馬國明及《救妻同學會》胡鴻鈞成為民選視帝。

民選最佳女主角 :黃智雯 - 方以因《三個女人一個「因」》(TVB)

被封為「星期日女王」嘅黃智雯,喺《三個女人一個「因」》中一人分飾三個人格,分別係大律師方以因  、狂野暴躁嘅菠椰同埋憂愁細膽嘅愁擘擘,佢轉換人格非常流暢,演技不庸置疑,一直被網民視為係視后嘅熱門人選。今次黃智雯以大比數拋離對手《愛 ‧ 回家之開心速遞》呂慧儀 、《宮心計2深宮計》胡定欣、《BB來了》李佳芯及《天命》李施嬅成為民選視后。

民選最佳男配角:張景淳 - 龔燁《愛 ‧ 回家之開心速遞》(TVB)

張景淳喺《愛 ‧ 回家之開心速遞》飾演嘅「賤精先生」龔燁同呂慧儀飾演嘅熊若水互有好感,唔少網民都好想佢哋快啲喺埋一齊,角色除咗令佢人氣急升之外,大家都唔再淨係叫佢做「家明」。今次佢仲憑角色揮低《跳躍生命線》張彥博、《愛 ‧ 回家之開心速遞》周嘉洛、《跳躍生命線》李成昌及《棟仁的時光》胡鴻鈞奪得民選最佳男配角。

民選最佳女配角:林淑敏 - 龍力蓮《愛 ‧ 回家之開心速遞》(TVB)

林淑敏憑《愛‧回家之開心速遞》飾演「大小姐」龍力蓮一角。唔少觀眾都覺得佢霸氣得嚟又好搞笑,角色仲非常入屋,令佢以「票后」姿態連續兩屆成為民選最佳女配角,大比數拋離對手《宮心計2深宮計》陳煒、《愛 ‧ 回家之開心速遞》滕麗名 、《跳躍生命線》陳瀅及《跳躍生命線》張文慈。

其他得獎名單如下:

民選飛躍進步男藝員:張景淳(TVB)
民選飛躍進步女藝員:林秀怡(TVB)
民選最佳男配音員:馮錦堂 - 本之木桃矢《百變小櫻clear咭》(TVB)
民選最佳女配音員:林元春 - 木之本櫻《百變小櫻Clear咭》(TVB)
民選最佳綜藝資訊節目:《Goodnight Show 全民造星》(ViuTV)
民選最佳綜藝資訊節目主持:周奕瑋《周遊東京》(TVB)
民選最佳戲劇拍檔:張景淳、呂慧儀 - 龔燁、熊若水《愛 ‧ 回家之開心速遞》(TVB)
民選最佳劇集橋段:呂慧儀、張景淳《愛 ‧ 回家之開心速遞》/ 熊若水與龔燁被困密室,龔燁指示熊若水模仿某電視劇角色吃掉家明充飢般吃掉自己(TVB)
民選最佳電視歌曲:楊千嬅《無雙》-《三個女人一個「因」》(TVB)