【笑到標眼水】《黃金有罪》姚子羚被車撞飛CG差到有膠味?

《黃金有罪》截圖

無綫劇集《黃金有罪》搵嚟張兆輝、蕭正楠及姚子羚等人主演,劇集以經濟起飛嘅80年代作為背景,主要講述泰國華僑榮木桐Gordon(張兆輝飾)由最底層開始做起,點樣上位不擇手段成為香港首富。除咗劇中演員表現不俗之外,劇中有唔少生活情節及環境都引起共鳴,成功吸引唔少觀眾捧場,口碑甚佳。唔少網民都大讚劇集有劇味,不過噚晚水敏晶(姚子羚飾)撞車嗰幕,啲CG真係震撼到大家喇!

劇集喺今晚就會播出大結局,噚晚就講到Gordon被廉政公署調查,而水敏晶就擁有佢嘅犯罪證據文件,不過晶晶一直對Gordon念念不忘,所以就不停掙扎應唔應該將文件交出。Gordon好緊張咁去搵晶晶,要求佢將文件交出,之後錢永進(蕭正楠飾)就同Gordon打交。期間晶晶突然走出馬路,被車撞死。嗱嗱嗱!就係呢一幕,無綫嘅CG將晶晶彈飛到勁遠,仲要近鏡慢動作,搞到晶晶好似飄浮喺半空咁。

明明呢一幕係好哀傷,不過唔少網民都話睇到笑咗,仲話無綫將劇集劇膠化,紛紛留言話:「成家人笑咗出聲」、「有冇飛得咁誇張呀」、「呢套嘢臨尾派膠」、「呢個撞車係有史以來最假」、「嚇死人咩...撞飛到咁遠」、「以為佢會飄到上天做神仙」、「好地地一套劇就俾呢個位扣哂分」、「同關禮傑跳天台一樣咁震撼」、「個CG彈得好好笑」、「成套劇膠化」及「仲要平飛嗰下好笑」等等。

《黃金有罪》截圖
《黃金有罪》截圖
《黃金有罪》截圖
《黃金有罪》截圖
《黃金有罪》截圖
《黃金有罪》截圖