童話番外篇《黑魔后2》 故事竟然係阿媽大戰未來奶奶?!

有留意電影消息嘅朋友們,應該知道迪士尼喺今年3月收購咗20世紀霍士(20th Century Fox)所有影視業務,霍士旗下有迪士尼電影、動畫、漫威宇宙仲有Pixar動畫,單係電影方面已經手握半個環球電影票房咁滯!

成手好牌、已經係電影一哥嘅迪士尼並無因此放慢手腳,非常積極宣一眾新片。由《復仇者聯盟4》、《小飛象》、《阿拉丁》到即將上映嘅《獅子王》、《花木蘭》到未開拍嘅《小魚仙》選角,日日都有新聞出,霸佔娛樂新聞版位,今日又有《黑魔后2》最新預告片!

成班迪士尼公主陸續被改編成真人版電影,唯獨睡公主要讓路被佢養母黑魔后。由Angelina Jolie飾演嘅黑魔后瑪琳菲森,一改童話中邪惡設定,上集化身為被衰男人呃、一心復仇但仍然愛心爆棚,仆心仆命照顧睡公主Aurora(Elle Fanning 飾)嘅好媽媽。

舊瓶新酒嘅故事改動加上Angelina Jolie非常吸引嘅演出,首集《黑魔后》大收旺場。預計今年10月上映嘅續集,剛剛出咗預告片,講Aurora公主大個女想嫁人,同瑪琳菲森一齊去見未來奶奶Ingrith皇后(Michelle Pfeiffer 飾)傾下訂婚事宜,點知阿媽發爛渣、打交收場。

將童話故事發展成公主女大不中留,阿媽大戰未來奶奶,不得不佩服一班創作大臣咁有諗頭!預告片見到未來奶奶都有返咁上下架勢,有哂準備對付黑魔后,為咗愛女嘅幸福,瑪琳菲森仲有新造型迎戰!

不過最驚喜應該係新登場、由《被奪走的12年》男星Chiwetel Ejiofer飾演嘅魔王,佢嘅出現將會披露更多黑魔后身世之謎!雖然續集叫《Maleficent: Mistress of Evil》,不過到底指黑魔后本性邪惡定另有其人,就要等到今年10月先知啦!