砌低300電影溫碧霞奪「優秀影片」

東方日報
溫碧霞拿着獎座,笑指辛苦拍攝冇白費。

藝人溫碧霞(Irene)昨日代表其主演新片《嫌疑者說》出席在廈門舉行的「金雞百花電影節」盛事,她開心該片能撼低逾三百多部參選電影,被選為十大「優秀影片」之一,同時打入米蘭電影節。

Irene捧着獎座興奮地說:「真係好犀利,電影幕前幕後都好努力同認真,不枉全組付出嘅一切。」她回想當日在冰天雪地的烏魯木齊拍攝,開拍第一天已冷病發高燒,但休息一天後,翌日便抱恙開工:「嗰時天氣真係好凍,對腳好似結咗冰咁冷,身體貼滿暖包都冇用,不過病咗反而更加投入角色,因為劇情講我牽涉入一宗案件,要好崩潰同傷心,情緒完全啱晒配合晒個劇情,劇組買咗藥畀我食,拍咗兩日就好番晒,完全唔覺得辛苦。」