矽谷90億驗血騙局銀幕呈現 珍妮花羅倫斯演大話才女

曾經於辦公桌上貼咗句「Fake it till you make it」,勉勵自己返工唔駛下下用真感情。無論你覺得上司同事好煩定好黑人憎,定覺得佢地講廢話多過做嘢都好,都唔駛帶咁多私人感情,有時扮下friend用各自嘅職位同職能打交道,務求盡快處理好公事。

我以為扮工辦得好成功,點知睇完暢銷書《Bad Blood Secrets and Lies in a Silicon Valley Startup》之後,我終於明白點解我無發達。

有睇開財經界新聞可能都知Theranos醫療科技公司嘅故事,呢個可以話係矽谷最大創業騙案同扮工傳奇。創辦人Elizabeth Holmes 19歲從名牌大學Stanford輟學,於2004年創立Theranos公司,無任何醫療背景嘅佢,希望研發出抽幾滴血即可驗到幾百種病毒嘅可攜式機器。呢個聽落會為醫學界帶嚟革命性改變嘅醫療科技,亦吸引到第一筆創業資金。

Elizabeth Holmes憑住標緻嘅外型,刻意模仿Steve Jobs,包括打扮、用埋蘋果同一間廣告公司、開會風格等,加埋把聽落非常有說服力嘅聲線,同過份美好嘅研究成果而人氣急升,唔少媒體大力推祟佢為女版Steve Jobs!

不過一切都係假嘅,甚至乎佢聽落成熟有力嘅老牛聲都係刻意扮出嚟!實際上有資金有人才嘅佢,一直無得出任何科研成果,連部驗血機「Edison」都係得個殼,實際驗血工序係由傳統嘅血液檢測儀處理。

用唔存在嘅科技同假嘅實驗數據,成功令美國2大藥房同佢合作,於店內推行Theranos驗血服務,令公司估值一度高達90億美元!佢以此繼續游說到唔少富豪同大鱷投資落佢間公司繼續進行研究,連前國務卿舒爾茲、傳媒大亨Rupert Murdoch 、Walmart創辦人Walton家族等老手都中招,仲未計大量受驗血報告影響嘅普羅大眾。

紙終歸包唔住火,2015年《華爾街日報》頭版專題踢爆Theranos根本係騙局!Elizabeth Holmes被控多項詐騙,2018年9月Theranos先正式解散。

呢個故事同電影有咩關係?因為電影公司Legendary Pictures已經買左《Bad Blood》一書嘅電影版權,將會由奧斯卡影后Jennifer Lawrance出演Elizabeth Holmes一角。咁有爭議性嘅人物,絕對有望令J Law再次成為奧斯卡影后大熱。而執導嘅Adam McKay作品包括今年獎項大熱作《為副不仁》(Vice),擅長改編真人真事嘅佢,令Bad Blood更有睇頭。

一個大話講足十幾年,仲可以講到變市值90億美元,佢先係真正做到「Fake it till you make it」。Theranos創業故事牽涉商業責任、醫療道德,斷估Elizabeth唔會19歲就立心不良。佢由滿腔熱血到走火入魔,成件事好多人性交叉點,絕對係上佳電影題材。