睇camp爆泰片沖沖喜 Tootsies & The Fake 票房鍊贏《出貓特攻隊》

日日為咗口罩、廁紙、消毒用品奔波,又要留意住社會上大大小小嘅事,加上work from home,少咗社交活動,心情大受影響,個人謝哂!呢啲時候極需要喜劇調劑心情,今日想同大家介紹一套泰國瘋狂喜劇Tootsies & The Fake(台譯:《娘娘腔日記》)。

電影以4位好友做主角,分別係肥得嚟好靈活又妖豔嘅Golf、整容整上癮嘅空少Kim、最鍾意翻眼同嘴賤嘅Gus同唯一女人、勁靚但4個入面至man嘅模特Natty。故事講述網紅Kathy因為Golf而意外跌倒昏迷,嚴重影響工作進度,如果下星期前都醒唔返,拍唔到原定嘅廣告,就要賠償鉅額違約金!

正當佢地絕望,以為被人告硬之際,被佢地遇見同Kathy9成相似嘅街邊小炒檔西施Nam!4人幫決定將Nam大改造,進行密集式特訓,務求短期內發生「窈窕淑女」神蹟,頂替Kathy做時尚教主拍廣告!麻雀變鳳凰過程笑料百出,本身係國際時尚品牌寵兒嘅Araya A. Hargate一人分飾2角,分別飾演氣質女神Kathy同粗俗小炒王后Nam,演譯截然不同嘅性格,意外地放得開。

不過Tootsies & The Fake最有睇頭都係以Golf、Gus為首嘅4人幫,份屬好友嘅佢地互相扶持但又經常mean爆互窒。前一晚先嚟分手散心之旅,4個攬住喊苦喊忽,一覺瞓醒又會為咗新識靚仔爭餐死。而唯一女將Natty熱愛惡趣味,最鍾意對住啲friend放屁,戲中4人坐飛機遇上氣流,Natty越緊張越想開大差啲瀨出嚟,偏偏心儀對象又坐喺前面,空少Kim怕佢出醜於人前,無懼氣流,隻手抱Natty去廁所,呢啲朋友去邊到搵!

Tootsies喺泰國破哂紀錄,打敗《出貓特攻隊》成為泰國最高開畫票房冠軍。電影咁受歡迎係因為「4人幫」角色喺泰國好出名,佢地出自電視劇Diary of Tootsies,自2016年推出起,因為無尺度咸gag、9成內容都18禁、極mean又好笑嘅對話而大受好評,添食拍足2季。電影版繼續Tootsies嘅瘋狂爆笑,大受歡迎不無道理。

喺盡量少出入公眾多人場所嘅當下,建議大家搵住套電視劇睇住、笑住先!