【睇定唔睇】杜琪峰x韋家輝經典組合新片 《我的拳王男友》向佐孭飛

到底電影喺內地獲得上映許可,同退出金馬獎有無關係?呢頭宣佈退出金馬評委,轉頭電影即時上映有期,映期仲要撞正台灣金馬獎,又會咁巧合嘅?

講緊杜琪峰(杜Sir)搵向佐孭飛新搞作《我的拳王男友》日前宣佈於11月7日內地正式上映。

《我的拳王男友》前名又叫《追夢男女》,顧名思意係一套講述追尋夢想嘅故事。電影講述花街拳王魯虎(向佐飾)與追夢歌手杜小娟(王可如 飾)於拳賽中偶遇,自此成為歡喜冤家,朝夕相對互相鼓勵下慢慢萌生愛苗。

勵志、愛情加由杜SIR執導、韋家輝編劇呢個組合,製造咗《單身男女》、《瘦身男女》同《孤男寡女》等幾套經典都市愛情喜劇,照計《我》應該好對香港人胃口。不過電影似乎無意於香港上映,專攻內地市場。話說預告片一出,反應兩極,有觀眾期待杜、韋再次合作;同一時間都有唔少內地網友批評片名仲用「我的xxxx」好老土、「奇奇怪怪」、「為了捧向老板兒子」等。

主打內地市場一樣有隱憂。2016年《封神傳奇》搵群星拱照向佐,有李連杰、范冰冰、梁家輝、黃曉明、Angelababy等助陣,可惜票房低開、豆辦影評得2.9分,成績慘淡。3年過後,向佐因為參加內地綜藝節目累積咗人氣,同台灣女星郭碧婷因為做節目擦出愛火花,拍拖3個月後剛剛喺意大利結埋婚添!會唔會因此幫到票房,就要等11月先知。

綜藝節目中嘅向佐性格其實幾討好,佢近年密密拍戲,暫未有代表作,不過演技亦唔太差。今次為拳手一角都落咗好多苦功,操到副body好fit之餘,拍攝途中又被戲中MMA拳手打中暈低,可惜因為「名人二代」呢個身份,出道多年觀眾緣仍然麻麻。

名人之後入行起步有先天優勢,但同時又因為名人父母難以得到觀眾認同,好似日前向太好俾力咁喺微博幫套戲宣傳。幫阿仔宣傳無可厚非,但無啦啦拉埋「撃敗黑衣人」、「暴民」落水,同套戲嘅「熱血」扯唔上關係,仲久唔久因為愛國言論得罪香港觀眾,認真越幫越忙。

不過佢地未必介意,因為根本唔在意香港市場。