相愛28年撐過抑鬱症 張家輝關詠荷苦盡甘來 恩愛拍拖睇戲

張家輝&關詠荷

張家輝同關詠荷係娛樂圈公認嘅恩愛夫妻,佢哋相愛28年。近年張家輝忙於工作,好少見佢哋二人一齊出席活動。今日有報道指見到佢哋兩公婆去睇戲拍拖,享受二人世界。佢哋完場時十指緊扣,一邊行一邊討論劇情,面上露出幸福笑容,真係羡煞旁人。

其實佢哋依份幸福得來不易,當年關詠荷已經係電視劇女一,但張家輝仲係個三四線演員,唔少人都笑佢癩蝦蟆想食天鵝肉,想借關詠荷上位,最終搞到二人分手,張家輝患上抑鬱症,隻身去南非8個月。但關詠荷並無放棄,一直默默等待張家輝返黎,更照顧佢患癌嘅家姐。最後,終於感動到張家輝,二人重歸於好。

去到2003年,二人拍拖11年終結婚,知道張家輝鍾意小朋友,關詠荷放棄事業想做媽媽,但卻經歷2004年及2005年兩次小產,最後關詠荷以42歲高齡成功誕下女兒。後來張家輝工作越來越好,仲攞埋影帝殊榮,二人終於苦盡甘來。

張家輝&關詠荷
張家輝&關詠荷