白只肉搏做榜樣

東方日報
白只與林家棟埋位試戲,未Roll機已「開火」!

影帝林家棟與白只等前晚現身尖沙咀重慶大廈,為主演新片《手捲煙》開工。劇情交代兩人與十多個臨時演員發生肢體碰撞「肉搏」,正值新冠肺炎肆虐,台前幕後嚴陣以待,試戲時叮囑兩位主角戴口罩,正式埋位後又安排他們消毒。白只及家棟對劇組安排有信心,白只坦言:「只要做足措施就冇問題,如果我哋穩守得好,就做到好榜樣,為喺呢個時候有意欲開鏡嘅其他同業打支強心針!」

白只為片中造型犧牲不少,髮型前額剷青、後面留長,胸前的假紋身亦不易清洗:「出街戴帽,返屋企就出盡力,再加酒精抹甩紋身,都幾痛!」至於家棟表示重遊舊地勾起不少回憶:「以前我喺隔籬嘅酒店任職,成日同啲同事過嚟食咖喱角。雖然有廿幾年冇返過嚟,但係當時情景依然難忘。」

重臨舊地,林家棟零舍興奮。