疫情殺到 美國周末票房20年最低 康城影展隨時停辦

新型肺炎疫情於全球蔓延,未有緩減跡象。美國確診數字急升,就連影帝湯漢斯伉儷、《新鐵金剛之量子殺機》邦女郎Olga Kurylenko、NBA球星等相繼中招。美國部份地區需要關閉戲院,減少人流聚集,剛過去嘅周末美國錄得20年嚟最低票房紀錄!

因為確診人數越來越多,為咗保護工作人員安全,唔少拍攝工作都要叫停!包括湯告魯斯嘅《職業特攻隊》、有梁朝偉參演Marvel嘅《上氣》,華納由Robert Pattinson主演嘅《蝙幅俠》,連劇集拍攝都一併叫停,包括Netflix嘅《怪奇物語》第4季、華納嘅《Batwoman》、Amazon嘅《Lord of the Rings》等等!

拍攝工作外,亦有唔少業界大事受影響,好似每年4月於美國洛杉磯舉行嘅Cinema Con亦宣告取消。會議係各大荷里活片廠做節目巡禮大曬冷嘅平台,仲係介紹最新影視科技如音響、投射等設備嘅好時機,相信香港影視博覽(FIilmart)都係參考Cinema Con成立,香港唔少戲院人士都會出席,睇下有咩新科技帶返香港!

國際影展方面,法國傳媒報導連5月嘅康城影展都會取消,影展即時出面澄清消息不實,不過坦承疫情令選片進度受阻,加上隨住限制越來越多,法國禁止100人或以上嘅集會,意大利、西班牙及德國宣佈鎖國,多個國家又被限制入境,導致國際影人及業界人士屆時未能出席參與影展,影展總監Pierre Lescure表示,如果4月中疫情無好轉,會考慮取消今年影展。

如果取消的話,將會係康城影展舉辦73年嚟嘅首次,難怪法媒Le Point會用「一個時代嘅終結」嚟形容!新型肺炎牽連極廣,影視業界拍攝暫停除咗影迷、劇迷要等耐啲先有新一季節目睇之外,下年片單會變少,仲可能引起結業潮,因為無工開無收入,連帶戲院、電視、串流平台都無嘢播,齊齊攬炒!