【疫情下的中國電影】賈樟柯突破防線柏林參展 橫店影城容許復工

第70屆柏林影展於當地時間20日(星期四)正式開幕。貴為歐洲其中一個重要影展,如電影入圍競賽部份或參展成為其中一套選映作品,有助打開電影及台前幕後嘅知名度。以往不乏華語片參加,上年都有唔少內地電影參加,可惜張藝謀導演講述文革嘅《一秒鐘》以及曾國祥導演作品《少年的你》,都因為「技術問題」而要臨時抽起,退出影展。

今年因為疫情關係,華語片接近缺席,只係得賈樟柯導演突破防線帶埋新作《一直游到海水變藍》出席。其餘參展作品包括內地女導演宋方作品《平靜》,而蔡明亮導演嘅《日子》為為唯一入圍主競賽嘅華語片。

被問及無懼疫情都要親身參與嘅理由,賈樟柯導演就回應話疫情下更需要電影咁話,雖然明言工作因此受影響,唔少製作公司停工,預計最快都要6月先可以開返工趕進度!

內地整個演藝圈都受疫情影響,由電視到電影無一倖免,電視劇停哂拍唔到,電影就算拍咗都上唔到。由1月24日農曆年開始已經無新片上映,除咗本地製作蝕本外,連一堆提名奧斯卡嘅外語片如《陽光兔仔兵》、《小婦人》等都受影響,就算之後有返映期都錯過咗聲勢最強嘅時機!

無咗農曆年呢個黃金檔,內地電影網站時光網估計,發行商同戲院損失接近110億人民幣!唔知係咪為咗保住產業,開始想強行復工,拍劇熱點橫店影城就出咗份《橫店影視文化產業聚區管理辦公室關於確保新冠肺炎疫情防控期間影視企業(劇組)安全有序復工的指導意見》,講明將會分3個階段復工,只要劇組新年期間留喺橫店,無去過疫情嚴重地區,經過審批後,劇組可最快於2月13日復工。

第二、三階段復工時間就睇疫情係咪穩定而決定。現階段基本上講過「信」字,一個劇組有咁多人,成班演員一定無留喺橫店,到底有無去過疫區同接觸過患者,真係一日無病癥一日都唔知有無瀨嘢!

戲院方面因為無新片上映,接近全面停工零生意,唔少小型影院面臨倒閉,雖然仲未有復工日子,不過中國電影發行放映協會技術分會剛剛出咗份「復工準備建議」,內容包括消毒中央冷氣、風口,戲院內溫度、濕度等要求及叫觀眾自備3D眼鏡等。

無論係橫店定放映協會嘅復工指引,兩者都見唔到有咩具體防護建議。所以你有你出指引,劇組同戲院繼續停工。就算戲院開返又點,唔少內地網民表示一日疫情未過,都唔急住睇戲,命仔要緊!