當X-Men咁拍?新版《十兄弟》片花出街

早前TVB 2018年節目巡禮,預告會推出重新製作嘅電視劇《十兄弟》,劇集將會喺Big Big Channel 以網劇形式播放。

由張曦雯、黃嘉樂、謝東閔及張景淳等主演,今次仲係張曦雯同黃嘉樂首次擔正做男女一,佢哋分別飾演十兄弟阿媽同埋千里眼。想當年由林文龍、郭可盈做十兄弟父母嘅版本,雖然被稱為膠劇,不過最高收視都有39點,要突破嘅話好困難。

近日《十兄弟》預告片出街,有報導指呢條5分鐘嘅片花,無綫專登搵埋劇中演員去內地橫店拍攝,希望做到大製作嘅效果。

點知片花一曝光,就被網民話佢抄韓劇《鬼怪》、陸味濃同埋有啲似《少林足球》。一開頭就見到黃嘉樂,行到死下死下咁不支倒地,攤開雙手,再close up影住佢嘅右手……大家仲記唔記得《鬼怪》其中一幕都係影住孔劉行到嘴唇乾裂,最後同樣不支倒地,再close up影佢5隻手指半攤開。究竟係咪抄橋?唔好咁講,可能係對《鬼怪》致敬啫!

今次呢個新版時代背景都同前作一樣,故事仍然都係講述十個擁有超能力嘅兄弟點樣互助合作嘅故事。不過今次就會注入西方超級英雄元素,將佢哋變到好似亞洲版嘅《X-Men》咁。

雖然聽落比較新穎,不過大家都知道TVB嘅CG能力有幾多能耐架喇!就好似啱啱播完嘅《降魔的》咁,雖然故事唔錯,不過都係被網民批評啲CG太假,拖低晒劇集嘅質素。所以今次TVB就搵埋台灣製作公司合作,希望可以做到「世界級」嘅水準。

預計下年出街嘅《十兄弟》,可唔可以打破膠劇框框?就真係要等劇集出街先知啦!