當年文青聖地 影藝戲院今日結業

曾經寫下好多票房奇蹟、堪稱香港最早嘅art house戲院影藝戲院,做埋今日就結業。連戲院fb都冇公布(個page都係得5百幾人like),如果唔係有電影專頁po結業通告相,真係冇咩人講,無聲無息到令人唏噓。

(圖片來源︰是日觀影fb專頁

1988年,影藝戲院於灣仔新鴻基中心地下開業,專門播放內地、日本、歐洲等地嘅非主流藝術電影,當時得2個影廳,1 院128個座位、2院148個座位,戲院細細但經常全院滿座!

最威水包括1990年獨家上映嘅日本電影《搶錢家族》,因為口碑好捧場者眾,上足524日,票房收過1000萬!相比而家電影上映壽命相當短,唔收得上1個星期就落畫,好收得嘅超級英雄系列,都係上個幾兩個月。一套戲喺冇facebook宣傳、靠觀眾口耳相告做足年幾有多,睇返真係匪夷所思!

灣仔影藝仲有另一套經典,1996年獨家上映岩井俊二導演作品《情書》,做咗231日收600萬有多的票房,係要事先去戲院買定下星期戲飛先有得睇。「藤井樹」喺唔少香港人心中留下愛情的印記,當年嘅柏原祟靚仔到喊。

不過影��戲院最終因為經營虧損而不獲續約,喺2006年同灣仔院址暫別。然後喺2009年,影藝重新於九龍灣淘大商場開幕,變成共有696個座位嘅3間影院。由小眾art house慢慢變成中小型戲院,影藝戲院中間都有變過身裝修過,不過經營方針已經改變,多咗上主流影片。唔講起佢以前灣仔年代嘅威水史,可能唔少朋友仔以為佢是街坊戲院,久唔久排下冷門片,畢竟而家要睇藝術電影做文青,就梗係去油麻地嘅電影中心。

淘大商場嘅影藝戲院現址,好大機會由其他院線接手。我明白做主流電影或art house說到底都係一盤數,唔大賺都不能長期虧損,但我覺得唏噓係,無嘢留得住,集體回憶越來越少。

攞戲院做例子,不時有新戲院開,但都係喺原址不停換營運商、換層皮,約睇戲係講邊個商場邊個地標,而唔係個戲院名,因為你都記唔起間戲院係grand定city定movie乜乜乜。無名無姓面目模糊,連製造浪漫初戀嘅空間都無,同阿邊個邊個第一次出來見面間cafe?sorry,2個月之後變左「金拱門」lu~