【異國戀浪漫啲?】細數香港女藝人異國婚姻

不論國家文化及語言有幾大分別,只要係真愛,愛情無分國界,同樣唔受阻隔。好似早前《嫁到這世界邊端3》就分享香港人妻嘅異國愛情故事,其實娛樂圈女藝人都嫁外國人都唔係新鮮事,而家我哋就一齊細數下各位嘅異國婚姻啦。

梁詠琪&Sergio

想當年開完《香港G夜演唱會》嘅歌壇「玉女掌門人」梁詠琪Gigi,開完演唱會後原本打算去西班牙旅遊散心,點知就俾佢結識到現時西班牙藉老公Sergio。老公Sergio似顧家之人,對Gigi嚟講老公係一個既單純又風趣幽默嘅一位男士。估唔到一個旅行,就令Gigi及Sergio愛情路上打得火熱,二人確定關係後就算Gigi返咗香港都努力用電話維繫感情,同Sergio香港西班牙兩邊飛。不過遠距離嘅感情係辛苦嘅,Sergio因為好珍惜Gigi,所以先後向Gigi求婚。拍拖只係短短半年,二人於2011年10月4日於西班牙Ibiza小島舉行婚禮。婚後Gigi繼續係藝人歌手,Sergio就經營兒童時裝生意,2015年2月28更誕下混血可愛囡囡祈淑菲(Sofia)。

陳法拉&Emmanuel

女神陳法拉上一段婚姻與Neway太子爺薛世恆結婚結得低調,不過2013離婚一事就對外公開。恰巧與無綫完約嘅法拉,離巢到美國進修,就俾佢與於紐約工作嘅Emmanuel Straschnov邂逅,佢哋低調地相戀直到被人發現準備結婚。今年5月二人拉埋天窗,婚前法拉喺社交網站出PO老公為佢親自整設計嘅粉紅鑽石婚戒,惹人羨慕。睇得出佢而家咁幸福,讀書又叻,又簽得一間好嘅經理人公司。

周汶琦&Julien

曾經與杜德偉拍7年拖嘅周汶琦Kathy,分手後感情一直冇著落。直到俾佢認識到法國藉老公Julien。二人一直中西文化互相交流,相戀7年開花結果仲生咗兩位可愛仔仔Jacques及Avner。Kathy仲經常喺社交網站發放多張家庭樂照片,實行「有仔萬事足,幸福又快樂」!

官恩娜&Domingo

與中法混血兒醫生Juan-Domingo Maurellet相戀嘅官恩娜Ella,拍拖時多次被傳媒影到二人蹤影。2014年二人決定訂婚成為對方嘅終身,於2015年於香港舉行婚禮。官恩娜以女歌手出道,婚後已開始減產。婚後先誕下大仔Gabriel,2018年亦誕下細囡Aurelie。Ella亦多放時間投入家庭,相夫教子。

莫文蔚&Johannes

能夠與初戀開花結果成為夫婦實在唔係一件易事,但偏偏就發生於莫文蔚Karen及佢嘅德國藉初戀男友兼老公Johannes身上。莫文蔚半生青春有Johannes陪伴,佢17歲時已認識Johannes,感情曾斷斷續續分手及復合,發生多樣事情最終都成為對方終身戀人。二人至今已結婚8年,一直都係童話式嘅愛情,婚後冇生小朋友,不過佢哋仍然幸福,實在令人羨慕。

湯唯&金泰勇

2016年為韓國藉導演老公誕下愛囡Doris時,慢慢減產少出現螢幕前嘅湯唯,原本一直以為自己只會活躍於電影裡,點會估到自己會認識到韓國藉老公仲要嫁俾對方。2013年與韓國藉導演金泰勇相戀,一年後拉埋天窗,覺得一切都係緣份因為電影能夠令佢地認識及令到關係更親蜜。電影係佢地嘅證婚人,覺得緣份來臨絕對唔可以錯過。湯唯更認為自己同老公結婚多年能夠保鮮嘅秘訣就係「合而不同,唯心堅定」。

李玟&Bruce

本身係美藉華裔嘅李玟Coco,多次俾人誤以為係混血兒,但其實佢嘅父母都係確實係一位中國人。2003年認識一位加拿大富商Bruce,一直對Coco愛護有加,最終2011年結束長達8年嘅愛情長跑,2011年10月27於香港舉行「過億世紀婚禮」。

原子鏸&Mehdi

聊天App信唔信得過?原子鏸(Marsha)就係喺聊天App認識佢現時嘅摩洛哥藉老公。佢哋透過聊天App,從相識到見面再相戀。仲記得Marsha出道時係無綫電視藝人,不過一直都好少見佢做到女一。以最為人認知嘅感情時應該係同鄧建弘嘅一段感情。二人分手後Marsha都冇乜感情著落,直到用交友App認識摩洛哥藉型男Mehdi。2018年Marsha接受老公Mehdi求婚,喺今年2月舉行婚禮儀式。除咗Marsha開心之外,媽媽鄭佩佩同樣為愛囡感到快樂,見證幸福,更大讚Mehdi值一百分。