【男人的浪漫】帶領福特打低法拉利 真人真事銀幕熱血再現

鐘意賽車嘅觀眾有福啦!今年11月即將上映嘅電影《福特Vs法拉利》,改編自真人真事,故事設於1966年,以法國勒芒24小時耐力賽為背景,當年福特車廠憑Ford GT40終於打敗多年冠軍嘅法拉利,名符其實美國夢成真,成為一時佳話!

電影故事講述賽車設計師Carroll Shelby(Matt Damon飾)答應福特車廠於90日打造賽車。有好車都要有好車手配合,於是搵來英國車手Ken Miles(Christian Bale飾)合作,以打敗法拉利為目標,為長年屈居亞軍嘅福特贏得勒芒24小時耐力賽!

《福特Vs 法拉利》講賽車,當然有大量名車出現,電影仲搵嚟《弦途有你》、《盧根》嘅James Mangold執導,導演揚言自己唔多鍾意電腦特效,仲話荷里活電影特效氾濫!

所以拍《福》堅持真賽車,主要用特效還原時代感,當中唔少鏡頭仲係2位男主角親手上陣,落場揸埋一份,對體能有相當高要求。飾演賽車手嘅Christian Bale飛車戲特別多,難怪戲內嘅佢相當fit下!

導演既然咁著重畫面真實,對人物心理亦非常著重,有睇過導演前作都知佢有幾擅長寫人情,片中各個角色都好有發揮空間,Ken Miles熱愛賽車可惜人到中年仍未獲得佳績,所以面對Carroll Shellby嘅邀請願意放手一博!

而Miles因為身體毛病無奈從賽車生涯退役,熱愛賽車嘅佢轉投賽車設計同管理工作,唔做賽車手但無離開過條跑道,成件事非常熱血!

Matt Damon同Christian Bale 2位男星接戲一向謹慎,《福特Vs法拉利》搵到佢2位做主角,絕對信心保証。真人真事加上「美國夢」,有望成為下屆奧斯卡大熱電影!