甄詠珊擺街站 何廣沛摸上門Encore

東方日報
甄詠珊一身「鳳姐」造型咁索,何廣沛忍唔住直豎拇指。

藝人方紹聰日前與何廣沛等開工「撳鐘仔」,摸上門搵性感「鳳姐」甄詠珊。何廣沛笑言現實冇需要,相反方紹聰自爆有經驗!

方紹聰(奶仔)、何廣沛、郭子豪及甄詠珊等日前現身深水埗,為無綫新劇《食腦喪B》開工。戲中何廣沛專食人腦,有「仵作佬」好兄弟奶仔為他「覓食」,該場戲講述他吃下嫖客的腦後,對「鳳姐」甄詠珊有所記憶,故登門造訪,在街頭「獨腳拉扯」,相當入戲。

工作人員在外景樓下放置「一樓一鳳」招牌,加上甄詠珊性感登場,場面幾可亂真,記者打趣問三位男演員可有「撳鐘仔」經驗?何廣沛即說:「我冇呢方面需要,未試過呀!」郭子豪則幽默說:「有……我撳平安鐘囉!」奶仔卻語出驚人:「我真係有撳過呀!」原來所謂的「撳鐘仔」,全因工作需要,他說:「以前屋企人經營洗衣舖,有段時間想生意好啲,就去『一樓一』撳鐘碰吓運氣,希望佢哋幫襯。其實嗰度環境都唔差,唔係咁可怕嘅。」兩位拍檔聞言勁驚訝,並齊聲問:「咁你幫佢哋洗毛巾?」奶仔淡定說:「我屋企洗毛巾好乾淨,唔係賣廣告,因為間舖都執咗!」

朱智賢唔急做「東嫂」

同劇另一藝員朱智賢昨日現身電視城繼續開工,拍攝一場生完BB戲份,她笑言現實中比較喜歡生女。談到日前出席同學婚禮,問到與謝東閔發展地下情的她可有計劃結婚?朱朱坦言:「依家事業搏殺期,畀呢幾年盡力做先,同埋哥哥又生咗小朋友,父母都冇催。(有共識?)要有好好嘅經濟基礎先,佢呢排拍完劇都專心出歌啦!」講到謝東閔於新劇黐假鬚,她笑說:「佢本身冇乜毛,女性賀爾蒙過多,但佢黐完又好鍾意。」

郭子豪(左起)、何廣沛與方紹聰一講「撳鐘仔」話題,眉飛色舞!
朱智賢笑謝東閔冇乜毛……講邊度呢?