王浩信高危接Job

東方日報
王浩信現身公開活動唔戴罩,與背後的戴罩人群相映成趣。

日前「冧廠」病倒的王浩信昨日未有佩戴口罩現身公開活動,現場逼滿逾二百人,部分人更未有戴口罩。問到會否擔心被傳染?王浩信說:「做嘢冇計,相信大家嘅預防意識好好。(你冇戴口罩上台喎。)相信任何一個冇戴口罩都擔心。(酬勞好好,所以接呢個活動?)滿意,咁嘅環境下難得有工作,作為前線人員,唔通覺得有危險,連戲都唔拍咩!」

提到健康情況,他強調確定沒有任何徵狀才返工,但未有睇醫生及做快速測試:「都怕傳畀囡囡,我做足防禦措施,戴晒口罩先同佢傾偈。」又透露新劇《踩過界II》的緬甸外景拍攝計劃有可能取消:「擔心去到製作唔到、又返唔到香港。」

另外,《踩II》的「冧廠五人組」蔡思貝、王浩信、張曦雯、張振朗和簡淑兒因病倒令劇集停拍,各人經休息後已復工,蔡思貝於本月6日29歲生日,獲拍檔送上三個生日蛋糕慶生,氹得壽星女相當開心。

蔡思貝(中)生日,一眾拍檔為她慶祝。
左起:吳嘉儀、朱智賢、張曦雯、蔡思貝、張振朗、王浩信