王浩信咀過界 張振朗面都紅晒

東方日報
女錫女似乎很合理,不過男錫男就……難怪張振朗面都紅晒啦!

張振朗與張曦雯(Kelly)日前為新劇《踩過界II》開工,二人獲同劇的王浩信與蔡思貝送上蛋糕及香檳慶祝,更吻賀二人贏得「飛躍進步獎」,振朗被浩信吻後被取笑,害羞得滿面通紅。

在台慶頒獎禮當晚獲得「飛躍進步獎」的張振朗和張曦雯,翌日齊齊於凌晨開工,就算冇得抖也絕不慘情,因有同劇拍檔蔡思貝送上驚喜。王浩信稱思貝的主意多多,由他送出肉嘴賀振朗,HeHe柔情直令他面紅耳赤,眾人希望新劇收視也能飛躍進步。

攞完獎一走了之

Kelly表示頒獎禮當晚未有機會恭喜振朗,大爆對方烏龍事,攞飛躍獎就變了冇尾飛陀,竟沒有為公司拍得獎訪問片段。振朗解釋以為只有男女主角才需要拍攝,不知自己也有份,才返了屋企。他稱今次得獎是一個鼓勵,過後就要重返現實努力開工:「攞咗個獎係多咗動力,要再努力畀心機,今日拍十三個鐘。」

問到女友如何為他慶祝?他說:「佢有好好恭喜我,第二日好匆忙咁食咗牛扒。其實得獎當晚已經好開心,落台時有好多人走埋嚟情深咁攬住我同拍一拍我,呢個係一個尊重,好感動。」提到周嘉洛獲「男配」而引發不少網民戥其不值,振朗說:「佢嘅角色成為好多話題同點擊率高,我冇所謂,有獎攞已經OK!」

張曦雯拍床戲瞓着

至於Kelly今次在《踩II》中要將浩信內斂的心扉打開,問到是否由她採取主動?她說:「我都主動,因為我係外國返嚟所以open啲。」並透露日前跟對方拍了床戲,為浩信獻出第一次:「係我第一次拍床戲,不過冇嘢睇,因為太攰瞓着咗。」

眾人在天台開香檳,慶祝張振朗和張曦雯攞獎。
張曦雯與張振朗攞了獎還沒時間慶祝,便要開工直踩十三小時。
「盲俠」艷福無邊,今輯與張曦雯情話綿綿。