王晶幫理不幫親鬧爆王子涵

東方日報
王子涵首次於電視劇孭重飛,當然全力以赴。

王晶與女兒王子涵「父女檔」拍劇!王晶笑指於片場忙教女,慶幸女兒有高人指點,最終順利過關。子涵感激一眾「恩人」教導,直言懶理旁人指點,盡力做好本分。

由王晶監製的無綫新劇《荷里活有個大老千》,將於1月14日晚上9時30分於翡翠台播出。故事講述鄭則仕扮演的龍四,被華探長文雄(湯鎮業飾)陷害坐監,其女友百合(張慧儀飾)被迫成為對方小三。出獄後,龍四改行當電影製片,重遇舊情人丁玲(金燕玲飾)及女兒小雨(王子涵飾),並於片場發生連串笑料,之後他被迫「重出江湖」,與文雄決一死戰!

懶理閒言閒語

王晶坦言對這類舊式題材「情有獨鍾」兼有信心,加上故事開始及尾段的報仇情節緊張,又涉及親情催淚,相信很易掀起追看潮。提到與王子涵父女檔上陣,囡囡更首次「孭重飛」,他笑言:「張慧儀同扮演經理人嘅李施嬅先係女主角。(子涵表現達標?)以往佢未摸到自己條路,今次合格,不過我鬧得最多係佢,咁自己個女唔鬧,唔通鬧其他人咩?佢應該多謝前輩包括金燕玲,大家都幫咗佢好多。」

今次子涵扮演十餘歲出頭的青春少艾,她坦言有壓力,但全力以赴:「每次開劇我都會減肥,但今次試造型時,大家都話有Baby Fat比較切合角色,所以我唔減之餘仲好放肆,喺片場食油膩同辣嘢。不過拍攝時好熱,好快又瘦番,有啲擔心劇集出街時,造型唔係好連貫。」對於一眾前輩指點及幫助,她會銘記於心:「冇人奉旨對你好,所以要識感激。(驚人哋話你係王晶個女先有機會?)成日都有人講,但希望觀眾睇到我嘅努力。」

張慧儀難忘大膽戲

至於張慧儀非常感激王晶給她一個敍舊機會:「其實好多台前幕後嘅工作人員,都係以往我拍王晶電影合作過嘅,大家多年冇見再聚首,感覺好親切。」又自爆最難忘與湯鎮業有「大膽戲」:「唔係你哋諗嗰種(性感),但我又唔可以劇透喎,留番大家睇。依家我最想遇到好角色,有得發揮嘅,而今次一眾年輕演員入面,我同子涵算最多對手戲,睇得出佢好努力同認真。」

李施嬅飾演經理人,誓要捧紅旗下藝人。
王晶笑言片場無父女,應鬧則鬧。
張慧儀很開心遇到好劇本。
王子涵感激金燕玲教戲。