王君馨譚俊彥當街咀約「正印」打底

東方日報
君馨咁正,點解譚俊彥咁嘅口面o架?

譚俊彥與王君馨日前為新劇當街錫錫,事前特地相約對方另一半飯局,最終咀一次就收貨,默契十足!這對「哎吔夫妻」開工時不停交流夫妻經,從而加深對另一半的了解。

無綫小生譚俊彥,日前與王君馨在中環為新劇《失憶24小時》拍談情戲,身穿低胸裙的君馨相當養眼。劇情講述演夫妻的他們在街頭耍花槍,譚俊彥因工作撇低君馨,當然要錫番啖氹老婆!

趕工冇覺好瞓

劇集拍到尾聲,二人默契十足,Kiss時似足老夫老妻,自然流暢,譚俊彥說:「拍咗兩個幾月,大家一講就識笑,喜劇就係要咁。好早之前搵埋佢老公同我老婆一齊食飯,大家都認識,會拍得輕鬆啲,大家都知拍戲係咁,冇乜嘢。」又表示近日趕煞科,忙得冇覺好瞓,外景接廠景開工,每日只有3小時瞓覺,因不夠精神而暫不駕車,寧願坐公司車,趁機補眠。

唔怕老公口花

至於君馨透露不時與譚俊彥傾夫妻經,她說:「之前食飯見過佢老婆同仔女,我哋成日傾夫妻經,喺第二個男性角度睇婚姻,可以學到好多,亦更加理解我老公,明白佢嘅諗法。佢同我老公有啲似,都係外國返嚟,鍾意打機,唔係好識氹老婆又唔浪漫,依家會覺得有啲可愛,起碼佢唔會對人口甜舌滑!」

君馨與譚俊彥呢個「婚外咀」一Take搞掂,唔怕另一半呷醋。
被「老公」激親的君馨,嬲到嘴扁扁。
譚俊彥瞓晒地玩「低炒」,影咩呢?