王卓淇創業一腳踢化身港姐羅拉搬貨

東方日報
「派軍糧」變網紅
王卓淇經常晒性感靚相,火速吸納逾14萬追隨者。

前港姐王卓淇入行多年,雖然有富爸爸撐腰,但為了自力更生,她毅然將多年來辛苦儲下的六位數字私己錢,一鋪過投資服裝及膠原蛋白生意經營副業,還由富家女變成「港姐羅拉」,搬貨執貨一腳踢,誓做商界女強人。

2014年港姐亞軍王卓淇(Erin),入行五年來工作不算多,雖然有個富爸爸,但她有感不能長期「飯來張口」,早前將多年儲落的六位數字私己錢,孤注一擲投資服裝店生意及膠原蛋白生意,憑雙手創一番事業,更要放下藝人包袱,落手落腳執頭執尾。

親力Sell客 做「生招牌」

日前,Erin被發現以短褲造型,現身港島區的服裝店,見她在收銀枱前處理兩大箱貨品,純熟地將它們入完再封箱,更「港姐羅拉」上身親自搬貨!弱質纖纖的她雖然有點雞手鴨腳,但仍然獨力捧起大箱到郵局寄貨,期間在人來人往的街道穿梭,面上沒有半點辛苦,非常捱得!隨後,Erin返回服裝店繼續開工,見她執貨、摺衫一腳踢,更落力向客人推介,又不時「人肉衣架」上身,落足嘴頭推銷,完全放下藝人架子。除了埋頭苦幹在店內處理文書工作,她又趁未有顧客時換上店內衣服兼自拍,再上載到社交網做「生招牌」,實行全方位宣傳吸納客源,難怪深得網友歡心。

拍劇收入不穩 家人救濟

為生意捱生捱死,Erin受訪時透露全因藝員收入不穩,她自爆一直要家人幫忙才可應付生活支出,幸好上月生意收入可以幫補家計,還給家人家用:「入行後,我有糧出都會畀家用媽咪,當然數目唔會係好多,所以要靠屋企人幫我手,先可以應付生活,好開心上個月拎到五位數字家用返屋企,我會繼續努力!其實我喺英國碩士畢業之後,就加入無綫拍劇,冇返過其他工,今次係我第一次做生意,啲衫係我真心試過先同佢哋合作,產品都係我試過先拎個代理返嚟。」

雖然生意收入可觀,但Erin強調演員工作才是首位,問到做生意會否介意被指「賺錢買花戴」?她說:「我屋企係小康,但有冇錢都好,自己都要奮鬥同努力,我好想報答屋企人,有機會請佢哋去旅行。」

王卓淇
雖然弱質纖纖,但王卓淇仍頂硬上,出力捧起大大箱貨物。
老闆做埋售貨員,向客人落力推銷。
開舖一腳踢,跪地封箱都要自己嚟!