《獅子山上》 重建獅子山精神

獅子山精神曾經代表每個香港人。時代變遷,獅子山精神都要進化,成為一種不屈不撓堅持嘅象徵,特別對於依家嘅香港,香港人只能堅持,因為堅持才會睇到希望。

要自救除咗支持黃色經濟圈亦包括支持本地文化,香港曾經用電影、音樂等影視文化,影響全亞洲。近年卻因為大量合拍片而搞到無哂本土特色,隨手攞起一套所謂大片睇睇,你會發現除咗幾位(甚至只有1至2位)主角係香港演員同配咗廣東話對白外,其他環境元素完全抽離香港,故事可以隨便於任何一個城市發生。

影視界缺人才嗎?又好似唔係,放眼唔少內地劇集、綜藝節目幕後人員名單,其中不乏香港人,當中唔少為咗飯碗而北上,其中亦有唔少人寧願留喺香港拍多幾個《十年》。所以作為觀眾,我們盡量支持本地藝術工作者,有唔少新晉導演喺有限嘅資源下仍然用心拍攝一套又一套關於香港人嘅電影。

其中一部包括今個星期四上映嘅《獅子山上》,電影由梁國斌執導,前作有玩味十足、借無家可歸殭屍復活橋段反映土地問題嘅《死開啲啦》,今次再述香港勵志真人真事。攀石運動員紀大偉 (林德信 飾),因車禍半身不遂,眼看一生就此罷了,誰知意外後像獲得異能一樣,看透別人化身不同動物,自此走進一段奇幻復康之旅,途上每次荒誕遭遇,叫他學懂更瞭解自己。

將人睇成動物唔係特異功能,而係紀大偉於手術後因為以嗎啡止痛而產生嘅副作用,而佢為咗太太及初生兒子,決定停用嗎啡機。復康之路雖苦,但為咗自己及家人而堅持落嚟,最後坐住輪椅登上獅子山。戲中嘗試加入幽默場面,好唔好笑就見仁見智,反正大家心情沉重,可能正正需要呢啲笑位!

紀大偉因為車禍失去咗健全嘅身體,只能用意志搭救。香港人呢幾個月所失去嘅亦難以彌補,我們只能用意志、堅毅重新建立香港價價,事情會點發展無人可預計,唯有各自盡力。