「牛雜妹」李亦喬客串《開心速遞》 演出幾秒已獲網民關注

《愛·回家之開心速遞》截圖

無綫處境劇《愛·回家之開心速遞》除咗劇情輕鬆搞笑又貼地之外,一班劇中演員仲演得夠放,所以一向深得觀眾愛戴,所以長做長有。劇集經常搵嚟唔同嘅演員客串,最新就有2015年落選港姐李亦喬(Monnie)。喺上星期二(10日),佢喺單元「醉爆廢柴同盟」尾段客串飾演一位「好爸Bar」其中一位年輕客人,雖然只係出現幾秒,對白亦唔多,憑住美貌成功吸引網民留言。

《愛·回家之開心速遞》截圖

現年27歲嘅李亦喬(Monnie),原名係李美琪,佢喺2015年以牛雜檔太子女嘅身份參選香港小姐,所以就被稱為「牛雜妹」,雖然佢因身形未達標,最終16強止步,不過就成功加入娛樂圈。冇簽約無綫嘅佢,喺15至16年就簽過兩間公司,曾經係甄詠珊師妹,參演過《獅子山下2015》。之後,佢就去咗ViuTV參選《美選D.n.A》,雖然都係落選收場,不過佢就獲得演戲嘅機會,例如《詭探前傳》、《假設性無罪》及《黑市》。另外,佢仲試過為《向西聞記》及《性敢中環》客串。最近佢喺《愛·回家之開心速遞》嘅演出都係客串性質,今次唔係佢第一次為《愛·回家之開心速遞》客串,其實佢前後已經客串過8次,不過因為係特約演員身份,所以片尾演員表係冇佢個名出現。而自由身嘅佢,目前就忙緊排練舞台劇。

至於感情方面,李亦喬已經名花有主,有一個拍拖三年嘅糖水店太子爺男友Jill。喺今年嘅生日,李亦喬喺社交網站分享生日會相片及高調放閃。

李亦喬
李亦喬
李亦喬
李亦喬
李亦喬